«Қазақстанның Ядролық қоғамы» қауымдастығының атқарушы директоры Наталья Жданова мен «Семей-Невада» антиядролық қозғалысының вице-президенті Сұлтан Картоев «Күнделікті тірліктегі радиацияның әсері» деген тақырыпта семинар өткізді.
Н.Жданова радиация тақырыбына тоқталып, Қазақстанда салынатын АЭС-тің маңыздылығын атап өтті. Қарапайым тұрғындар арасында атом энергиясының қажеттілігін түсіндірудеміз, деді Н.Жданова, сондықтан да әрбір семинар сайын бейнефильмдер көрсетіп, слайдтар қолданамыз. «Невада-Семей» қозғалысымен тығыз қарым-қатынаста жұмыс істеп, Семей полигонынан зардап шеккен балаларға жазғы демалыс лагерін де бірнеше рет ұйымдастырдық.
«Қазақстанның ядролық қоғамы» ғылыми-көпшілік журналы тұрақты түрде шығып тұрады екен. Онда оқырманға қажетті ақпараттың барлығы бар. Жаңадан веб-сайт та ашылып, халық назарына ұсынылған. Жиында Назарбаев Зияткерлік мектебіндегі 9 «F», 9 «С», 8 «С» сыныптарының оқушылары Диана Кульгускина, Юлия Маслова, Әлия Тұманбаева, Мәди Райысов, Арнұр Батталов «Discovery planet» деп аталатын зерттеу жұмыстарын жұртшылық назарына ұсынды.
Оқушылар жақында Курчатовтағы Ұлттық ядролық орталық директоры Ерлан Батырбековпен кездесуге де барып қайтыпты. Е.Батырбеков дарынды оқушыларға қолдау көрсететіндігін айтқан.
Раушан НҰҒМАНБЕКОВА.
СЕМЕЙ.