Атырау қаласындағы AiRom Arena спорт кешенінің баскетбол алаңында 13 жастағы жасөспірім қайтыс болды. Қайғылы оқиға 8 қаңтарда болған, деп хабарлайды Egemen.kz.
Атырау облыстық денсаулық сақтау басқармасының мәліметінше, бала жедел жәрдем келгенге дейін қайтыс болған.
Спорт кешенінің мейірбикесі жүрек-өкпе реанимациясын жүргізгенімен, 103 бригадасы келген сәтте жасөспірім жансыз болған.
Жергілікті басылымның дерегінше, марқұмның жүрек жеткіліксіздігі болған, алайда ол медициналық есепте тұрмаған.
Айта кетейік, 3 қаңтар күні Алматы облысында мұз астына түсіп кеткен жасөспірім қаза тапқан еді.