Еркін елдің ертеңі
Өткеннен үлгі ала отырып, отаншылдық рухты қалыптастыру жолында жастардың бұл серпілісі жаныңа жылу ұялатады. Бір замандары Жан-Жак Руссо “Ең ұлы жақсылықтар мен игі жеңістер атамекенге деген сүйіспеншіліктің арқасында жасалады” депті. Шынында, атамекенін ардақтай отырып, сол қасиетті жерді қорғаған батырлар рухына тағзым етудің әдемі үлгісін Алматы облысы, Қарасай ауданындағы Қарасай батыр атындағы мектеп-гимназиясының оқушылары көрсетіп отыр.
Олар таяуда Алматы мен Астана арасында Жібек жолы бойымен экспедиция ұйымдастырып, киелі ұлт ұлыларына құрмет көрсетті. Астанаға атбасын тірегенде оларды елордадағы Райымбек батыр атындағы №50 “Қазғарыш” мектеп-лицей оқушылары қарсы алып, елордамен таныстырды. Қалалық білім басқармасының бастығы Ә.Бимендина оқушыларды қабылдап, олардың Солтүстік Қазақстан облысы, Айыртау ауданында жатқан Қарасай мен Ағынтай батырлардың басына барып қайтуға, одан өзге де ұлтымыздың арыстарының рухына құран бағыштауына мүмкіндік жасады.
Білектің күшімен, найзаның ұшымен осынау байтақ даламызды басқыншылардан қорғаған батыр бабалар бастарына барып зират етумен ғана шектеліп қалмай, олардың бойындағы ел мен жерге деген адалдықты, батырлық пен батылдықты үйренсек, ойымызға дарытсақ, сөйтіп, замандастарымызға үлгі болсақ деген оймен осы жорыққа шыққан едік. Бұл жолы Жетісу мен Арқаны араласақ, алдағы уақытта мұндай сапарларды батыс өңіріне жасап, Исатай мен Махамбет бабаларымыз басқан өңірге жол тартпақпыз, – дейді қарасайлық оқушы Елдар Жұматаев.
Сүлеймен МӘМЕТ.