Соңғы кезде Жамбыл облысы ІІД-нің қызметінде ілгерілеушілік байқалады. Жыл басынан бергі атқарылған қызметке сараптама жасалған кезде, мысалы, полиция жасағының жету уақыты бұрынғыдан жеделдей түскен. Бұл көңіл толарлық жағдай. Өйткені, құқық бұзушы қылмыс жасағаннан кейін 10 минөт ішінде хабарласып, полиция қызметкерлері оқиға орын алған жерге жедел жетіп үлгерсе, онда қастандық әрекеттердің 80 пайызы ізі суымай ашылады екен.
Ал бұрын “02”-ге хабарласу қиынға соғатын, соның салдарынан кезекші жасақтар шақырылған жерге дер кезінде жете алмайтын. Қазір бұл қызметті көп арналы телефон аппараттарының көмегімен үш оператор сапалы атқаруда. Соның нәтижесінде қылмыстық оқиғаның тәулік ішіндегі ашылуы 82 пайызды құрап отыр. Мысалы, жыл басынан бері бейнебақылау жүйесі көмегімен 61 қылмыс ашылса, оның ішінде тонау мен қарақшылық шабуыл – 21, ұрлық 24 рет орын алыпты.
Құқықтық тәртіпті нығайтып, азаматтардың қауіпсіздігін күшейтуге мүдделі облыс әкімі Қ. Бозымбаев бейнекамералар санының артып, полиция қызметіне қажетті басқа да техникалық құрал-жабдықтарды көбейтуге жете мән беріп отыр. Биылғы жылдың соңына дейін техникалық базаға тағы 40 бейнекамера қосылмақшы. Ол бейнекамералар қоғамдық орындарға, білім беру мекемелері маңына және халық көп шоғырланатын жерлерге қойылмақ. Кафелер мен түнгі клубтарға бейнекамералар орнату мен меншік иелері есебінен жеке күзет құрылымдарын тарту жөнінде Тараз қаласының әкімі Е. Астаев та жақсы жұмыс істеуде.
Сондай-ақ, облыс әкімінің бастамасымен арнайы жасақ, патрульдік жол полициясының саптық бөлімшелері мен мектеп инспекторларын 200 қызметкерге толықтыруға ақшалай қаражат бөлу жоспарлануда. Автопарктегі қызметтік автокөліктерді 46 бірлікке арттыру және қызметтік форма алу, ІІД-не қарасты ғимараттарға күрделі жөндеу жұмыстарын жүргізіп, материалдық-техникалық базасын күшейту, сонымен бірге жол полициясы басқармасы әкімшілік ғимаратының жаңа құрылысын бастау жоспарланды. Қазіргі таңда ІІД қызметкерлеріне арналған көп қабатты үй құрылысына жер телімін бөлу мәселесі қарастырылуда.
Облыс ІІД-іне келсек, мұнда өңір полициясының басшысы, полковник Б. Аймағамбетов қоғамдық тәртіпті сақтау мен құқық бұзушылықтың алдын алуды күшейту бойынша жеке құраммен тиімді іс-шаралар қабылдап, патрульдік полиция қызметін күшейтуде және реформалауда. Соның нәтижесінде, патрульді-бекеттік жасақтың беріктігі мен патрульдеудің жаңа маршруттарының саны арта түскен. Тергеу мен криминогендік тексерудің бастапқы кезеңінде шұғыл тексеру әрекеттерін жүргізудегі тергеу-жедел топтарының мүмкіндіктеріне, жеке құраммен жүргізілетін тәрбие жұмыстарының, басқарма мен полиция еңбегіндегі ғылыми ұйымдардың актуальды мәселелері де шешіле бастаған.
Облыста полицияның барлық автопарктерін спутниктік навигация жүйесімен жабдықтау мәселесі де ойластырылуда. Сондай-ақ, біраз жыл бұрын өз жұмысын тоқтатқан медициналық сауықтыру орнын қайта ашу мәселесі де қарастырылуда.
Көсемәлі СӘТТІБАЙҰЛЫ. Жамбыл облысы.