Кеше Астанада «Самұрық-Қазына» ҰӘҚ бастамасымен ұйымдастырылған Қазақстан тауар өндірушілері форумы болып өтті. Оған Вице-Премьер, Индустрия және жаңа технологиялар министрі Әсет Исекешев, «Самұрық - Қазына» ҰӘҚ басқарма төрағасы Қайрат Келімбетов, «Атамекен одағы» Қазақстанның ұлттық экономикалық палатасы төралқасының төрағасы Тимур Құлыбаев, сондай-ақ бірқатар қазақстандық тауар өндірушілер қатысты.
Аталмыш шарада отандық тауар өндірушілерге ұлттық компаниялармен және даму институттарымен бірге ынтымақтасып жұмыс істеудің ұзақ мерзімді форматы ұсынылды. Қор компаниялары жалпы сомасы 655,5 млрд. теңгеге сай тауар, қызмет, жұмыс түрлеріне 217 ұзақ мерзімді келісім- шарттар түзген болса, аталған басқосуда көмір, темір-бетон және радиотехникалық құрылғыларға 108 млрд. теңгеге сай ұзақ мерзімді келісім-шарттар түзілді. Тауар, қызмет, жұмыс түрлерін сатып алудағы қазақстандық үлесті арттыру бойынша мемлекеттік саясатты жүзеге асыру арқылы қор отандық өнім өндірушілерді қолдауда белсенді жұмыс атқарып отыр. Қазіргі таңда қор құрамына кіретін 260 ұйымда сатып алу ережелеріне сай сатып алу шаралары жүргізіліп, осы жылы жалпы сатып алу көлемі 3,5 триллион теңгені құраған.
Қордың сатып алу шаралары кезіндегі сапалы мониторинг пен ақпараттарды көріп отыру үшін былтыр интерактивті қазақстандық үлес мониторингі жасалынса, форумда сол жобаның жалғасы іспетті қазақстандық үлесті дамытудың картасы көрсетілді. Онда қор компанияларындағы отандық тауарды алу мен ұзақ мерзімді сұраныс, сондай-ақ отандық өнім өндірушілердің экономиканың қай саласында жұмыс істейтіні туралы ақпараттар қамтылған.
Қазір «Самұрық - Қазына» ҰӘҚ компанияларының сұраныстары мәшине жасау, химия және металлургия өнеркәсібі, мұнай өнімдері мен электр энергиясын өндіру салаларында көрініс тауып отыр.
Жиын барысында ұлттық компаниялар келесі жылға деген өз қажеттіліктері туралы ақпараттарын, орта мерзімге арналған перспективалар төңірегіндегі жоспарларын, сонымен қатар инвестициялық жобаларды жүзеге асыру аясындағы қажеттіліктері жайындағы ақпараттарымен де бөлісті.
Келер жылы сатып алу шаралары 3,5 триллион теңгеден асады деп болжанса, оның ішінде 1,2 триллион теңге тауар сатып алуға бағытталмақ. Қордың компаниялары жыл сайын шамамен 70 мыңға жуық тауар түрлерін сатып алса, олардың дені елімізде шығарылмайтындар екен. Осыған байланысты қор отандық тауар өндірушілерді кешенді қолдауға бағытталған арнайы бағдарламаны жүзеге асырмақ. Ол ұлттық компаниялардың қажетті сұранысына сай жаңа өндірісті құруға бағытталатын болады.
Әбдірахман ҚЫДЫРБЕК.