Қазақстан Республикасының Сыртқы істер министрлігінде Қазақстан Республикасының Үкіметі мен Словак Республикасының Үкіметі арасындағы құпия ақпаратты өзара қорғау туралы келісімге қол қою рәсімі өтті.
Құжатқа қол қою екі ел арасындағы шарттық-құқықтық базаны кеңейтіп, мемлекеттердің ұлттық қауіпсіздігі мүддесіндегі ақпарат алмасуды жандандыруға мүмкіндік береді.
Қол қою рәсімінен кейінгі кездесу барысында еліміздің Сыртқы істер министрі Ерлан Ыдырысов пен Словак Республикасының Қазақстандағы Төтенше және өкілетті елшісі Петер Юза Қазақстан-Словакия ынтымақтастығының жағдайы мен оның дамуының өзекті мәселелерін талқылады.
Тараптар арада қалыптасқан достық байланыстарды одан әрі нығайта түсуге өзара қызығушылықтарын тағы да қуаттады.
Қазақстан Словакияны Орталық-Шығыс Еуропа аймағында және жалпы Еуропалық одақта өзінің сенімді саяси және экономикалық тұрақты әріптесі, сондай-ақ, достас мемлекет ретінде таниды.
«Егемен-ақпарат».