Энергетиктер электр қуатын артығымен өндіруде

Ақсудағы Еуразиялық Топ (ERG) құрамына кіретін «Еура­зия­лық энергетикалық корпорация» АҚ-та электр стансасының осы жылдың қаңтар айына жос­парланған электр қуатын өндіру мөлшері 1 млрд. 422,7 миллион кВт/с құрады. Бұл жоспарланған көрсеткіштен 32,7 миллион кВт/с артық орындалыпты. Электр қуатын артық шығару станса өнімін тұтынушылар арасындағы сұраныстың өсуіне байланысты. Еліміздің алып кәсіпорындары – ERG құрамына кіретін «Қазхром» ТҰК» АҚ, «Қазақстан электролиз зауыты», Соколов-Сарыбай кен өндірістік бірлестігі стансаның басты тұтынушылары. – Соңғы екі айдың ішінде стансадағы энергоблоктар тоқ­тау­сыз жұмыс жасады. Қаңтарда станса белгіленген қуатын 1912 МВт-ға дейін пайдаланды. Бұл көр­сет­кішке қол жеткізуге станса жаб­дықтарының жүйелі жаңарты­луы өз септігін тигізді, – дейді стансаның өндірістік-техника­лық бөлімінің басшысы Сергей Мануилович. Бөлім басшысы айтқандай-ақ, Ақсу электр стансасында 2001 жылдан бері ескірген жаб­дық­тарды жаңарту және қайта құру бағдарламасы жүзеге асырылуда. Қазіргі күні стансаның 8 энергия блогының 5 кешенді түрде жаңару мен жаңғыртылу жүйелері арқылы толықтай жетілдіруден өтті. Бүгінгі күні №5 энергия бло­гында құны шамамен 277 мил­лион доллар тұратын қайта құру жұмыстары жүргізілуде. 1996 жылдан бастап «ЕЭК» АҚ жаб­дықтардың күрделілігі әртүр­лі жөндеу және қайта құру жұ­мыстарына 190 млрд. теңге жұм­сапты. Жалпы, стансада бел­гі­лен­ген қуат көлемі 245 МВт құрайды. Ал кәсіпорынға қарасты «Шығыс» кенішінде де еңбек өнімділігін арттыратын жаңа техникалар жұмыс жасауда. Жуырда кеніштің техникалық паркі МПЛ-150М1У жаңа сынамалы өңдеу машинасымен толықты. Бұл механизм көмірді ұсақтап, оның сынамасын дайындау үшін зертханада сапасын анықтауға арналған. Техниканың өнімділігі – сағатына 2,2 тонна. Сынамалы өңдеу машинасы қатты отын материалдарын ұсақтағаннан кейін зертханаға жіберіледі. Жаңа МПЛ-150М1У машинасы ұнтақтағыш балғадан, шөмішті-шынжырлы конвейерден тұрады. Барлық бөлшектері бір жерде жинастырылған. Машинаны «ДИК» компаниясы жасаған, жаңа техниканың құны 5 миллион теңгені құрайды. Ол арнайы даярланған үлкен әрі жарық бөлмеде орнатылған. – Заман талабына сай жабдық біздің көмірді ұсақтау кезіндегі уақытымызды үнемдей түседі. Еңбек өнімділігі артады. Ескі жаб­дықпен салыстырғанда, көмір­ді ұсақтау кезіндегі шаң-тозаң­ның пайда болуы жаңа жабдық­тың арқасында азайды, – дейді «Шығыс» кенішінің бас геоло­гы Бектас Смақов. Бұл күндері «Еуразиялық энер­гетикалық корпорация» АҚ тұрақты түрде өндіріс тиімділігін арттыруда. Басты мақсаты – еңбек қауіп­сіздігін қамтамасыз ете отырып, әрқашанда алға ұмтылу. Кәсіп­орынға елімізде өндірілетін элек­тр энергиясының 17 пайызы және көмірдің 20 пайызы тиесілі. Кәсіп­орында 6 181 адам еңбек етуде. Фарида БЫҚАЙ, «Егемен Қазақстан». Павлодар облысы, Ақсу қаласы.