Қостанай қаласындағы «Отау-сауда» сауда орталығына сенбі, жексенбі күндері қалалықтар да, ауылдан базарлауға келгендер де соқпай кетпейді. Көкбазарға келгендер сауда орталығынан керегін табады. Мұнда киім-кешек, тұрмыстық бұйымдардан бастап, алтынға дейін бар. Сенбі күні әмбебап дүкенге келгендер алтыннан кем емес тегін кеңес те алып кетті. «Нұр Отан» партиясы облыстық филиалының «Жас Отан» жастар қанаты әдеттегідей кеңес орталығын осы «Отау-Сауда» сауда орталығына әкелді. Дүкеннің жергілікті дауыскүшейткішінен екінші қабатта кеңес орталығының жұмыс істеп жатқанын хабарлап жіберген еді, әп дегенше емханалардан, облыстық сайлау комиссиясынан, жұмыспен қамтуды үйлестіру және әлеуметтік бағдарламалар басқармасынан, жұмыспен қамту орталығынан келіп отырған мамандардың алдында жұрт кезекке тұрып үлгерді.
Кезектің алдында тұрған жігіт Денис Борсуков өткен жылы Автомобиль жолдары колледжін бітірген екен. Техник-механик мамандығын игерген. Алайда, көңіліне қонымды жұмысты әлі таппапты. Қазір жұмыссыз жүр. Ол жұмыспен қамту орталығынан келіп отырған мамандарға өзінің түйіндемесін тастап кетті. Әзірге оларға Денистің мамандығын іздеп, сұраныс жасаған жұмыс беруші бола қоймапты. Ал Ратхан Ахметов болса Қостанай мемлекеттік педагогикалық институтының спорт және денешынықтыру факультетінде оқып жүр. Өзінің болашағын ойлаған азамат кеңес беру орталығынан болашақ жұмысының жай-жапсары туралы білгісі келіпті.
– Шынымды айтсам, мүмкіндігінше жұмысты қаладан тапқым келеді. Соның мүмкіндігі қалай болатынын білгім келген. Мен оқу орнын келесі жылы бітіремін, сонан кейін қаладан жұмыс таппасам, «жастар практикасына» жазылуыма болады екен, – дейді Ратхан.
– Мен биыл сайлауда бірінші рет дауыс беремін. Маған облыстық сайлау учаскесінен келген кісі қандай құжатпен, қай сайлау учаскесіне баратынымды, алдын ала сайлаушылар тізіміне енгенімді қайдан білуім қажеттігін нақтылап түсіндіріп берді, – деді Қостанай мемлекеттік педагогика институтының бірінші курс студенті Руслан Мұхтаров.
Кеңес орталығында психологтар мен медицина қызметкерлері де жұртшылықтың сауалдарына нақты жауап беріп жатты. Олардың қан қысымын, қан құрамындағы қант мөлшерін де сүт пісірім уақытта анықтап берді. Кеңес беру орталығын «Нұр Отан» партиясы облыстық филиалының жастар қанаты жиі ұйымдастырады. Ол 2013 жылы құрылған еді, осы уақытқа дейін 5447 адам медицина, заң, құқық, қолжетімді тұрғын үй, білім алу саласынан тиімді кеңестер алыпты.
– Кеңес беру орталығы халықтың көмекке зәру санатына кеңес беріп, демеп жібереді. Оның артықшылығы да осында. Олар кейде емханаларға, кейбір мемлекеттік органдарға барып, бүгінгідей санаулы минуттарда сұрақтарына жауап ала алмайды, барлығына уақыт керек. Ал біз жұмысты күніне екі сағат осындай адамдар көп жүретін орындарда ұйымдастырамыз, – дейді «Нұр Отан» партиясы облыстық филиалының «Жас Отан» жастар қанатының төрағасы Ерлан Төлеутаев.
Кеңес беру орталығы «Жас Отан» жастар қанатының жобасы болғандықтан, кеңес сұрап келгендерге қаншалықты көмек берілгені партияның облыстық филиалы жастар қанатында қадағаланып отырады.
Нәзира ЖӘРІМБЕТОВА,
«Егемен Қазақстан».
Қостанай.