АСТАНА. 16 ақпан. «Астана» президенттік кәсіпқой спорт клубы елорда көшелеріне белгілі қазақстандық спортшылардың суреттерімен плакаттар іледі. Бұл туралы Астана қаласы әкімдігінің ресми сайты – astana.gov.kz-ке сілтеме жасаған egemen.kz тілшісі хабарлады.
Аталған әлеуметтік жарнаманы қаланың адамдар көп жүретін жерлерінде орналасқан Astana Bike велопрокатының 110 стансасынан көруге болады. Шараның мақсаты – жанкүйерлер мен спортқа әуес жандарды біріктіру, сондай-ақ, саламатты өмір салтын насихаттау.
Астаналықтардың назарына қазақстандық спортшылардың, Astana Pro Team велокомандасы, «Барыс» хоккей клубы, «Астана» футбол клубы, «Астана» баскетбол клубы өкілдерінің, Astana Arlans боксшыларының, Astana Motorsports ралли-рейдтері бойынша команда мүшелерінің суреттері ұсынылады.
Еламан Қоңыр.
Дерек: astana.gov.kz.
Сурет: «Астана» президенттік кәсіпқой спорт клубының баспасөз қызметі.