АСТАНА. 16 ақпан. Бүгін футболдан УЕФА Чемпиондар лигасының плей-офф кезеңі басталады. Бұл туралы egemen.kz тілшісі хабарлады.
Осы аптада аталған кезеңнің 4 ойыны ойналады. Бүгін Португалияның «Бенфикасы» өз алаңында Ресейдің «Зенит» командасын қабылдаса, Францияның ПСЖ-сы Англияның «Челсиімен» сынға түседі. Ал ертең Бельгияның «Гент» командасы мен Германияның «Вольфсбургі», сондай-ақ, Италияның «Ромасы» мен Испанияның «Реалы» (Мадрид) турнирдің 1/8 финалындағы алғашқы кездесулерін өткізеді.
Бүгінгі матчтар Астана уақытымен сағат түнгі 01:45-те басталады. ПСЖ – «Челси» ойынын қазақстандық ON-TV (бұрынғы «Таң») телеарнасы тікелей эфирде көрсетеді.
1/8 финалдағы қалған 4 ойын келесі аптада ойналады. Атап айтқанда, 24-25 ақпан күндері «Арсенал» (Англия) – «Барселона» (Испания), «Ювентус» (Италия) – «Бавария» (Германия), «Динамо» (Киев, Украина) – «Манчестер Сити» (Англия) және ПСВ (Нидерланды) – «Атлетико» (Испания) командалары күш сынасады.
Қарымта кездесулер 8-9 және 15-16 наурыз күндері өтеді.
Еламан Қоңыр.
Дерек: egemen.kz.
Сурет: shahta.org.