Жемісті жұмыс, Жарқын жеңіс

* Алматы «Нұр Отан» партиясының кезекті жеңісі Алматының қақ ортасын­да­ғы Балуан Шолақ атындағы спорт сарайында барша салтанат-шашу­мен тойланды. Саяси іс-шараға үш мың­нан астам қала тұрғындары мен пар­тия ұйымының мүшелері қа­тыс­ты. Жиналғандар алдына шық­қан Алматыдағы ең танымал нұротан­дық­тар қала тұрғындарына кешегі сайлаудағы таңдаулары үшін шын көңіл­ден ризашылық сезімдерін біл­дір­ді. Тәуелсіз Мемлекетіміздің ши­рек ғасырлық мерейтойының дәл ал­дында жасалынған халықтық тартуға нұротандықтар өз тарапынан ес­е­лен­ген жігерлі еңбегімен жауап бере­тіндіктеріне сендірді. – Құрметті алматылықтар! Сіздер күні кеше ел тағдыры мен жас мем­ле­ке­тіміздің болашағына бейжай қарай алмайтындықтарыңызды тағы да дәлелдеп шықтыңыздар, – деді белгілі ғалым, Жоғары оқу орын­дары қауымдастығының президенті, про­фессор Рахман Алшанов. – Парламент Мәжілісі мен мәслихаттардың жаңа құрамы, сөз жоқ, сіздердің бұл сенім­деріңізді ақтауға тырысады. Біздің алдымызда партия Көшбасшысы – Елбасымыз Нұрсұлтан Назарбаевтың «5 институттық реформаны жүзеге асыру бойынша 100 нақты қадам» – Ұлт Жоспарын орындаудың жарқын кезеңі тұр. Біз оны орындауға дайынбыз! Әйгілі Спорт сарайының іші жеңім­паздарға дауыстап, дуылдата қол шапалақтап көрсетілген қошеметтің толқынымен талай рет дүр сілкінді. Бұл шын мәнінде шынайы сайыстағы шынайы жеңімпаздарға көрсетілген құрмет еді. Халықаралық ІТ университетінің ректоры Дәмір Шыныбеков қазір ақпарат ағыны тоқтаусыз ағылған жаңа дәуір екенін алға тарта сөйледі. «Біздің еліміздің алдында жаңаша дамудың қарқын алған сенімді стратегиясын жалғастыру міндеті тұр. «Нұр Отан» партиясы алдағы бес жылда осынау ғаламдық мәні зор бағдарламаны жүзеге асыру жолында кезекті жеңіске қол жеткізеді. Өз басым осы кезеңде Қазақстанның әлемдегі бәсекеге қабі­летті 30 елдің қатарынан орын алуы­на «Нұр Отанның» үлесі айрықша болатынына сенімдімін», деді. Таңдау мәртебесіне ие болған халық қалаулыларының арқалар жүгі қазір­гідей әлемдік дағдарыс белең алған қилы кезеңде, тіпті, ауырлай түспек. Же­ңім­паздар форумында ол туралы да ашық айтылды. Салтанат пен қуаныш форумының соңы еліміздің ең танымал өнер жұлдыз­дарының концертімен жалғасты. Суретті түсірген Юрий БЕККЕР. * Ақтау Ақтауда «Нұр Отан» партиясының сайлаудағы жеңісі Наурыз мейрамымен бірге аталып өтті. Теңіз жағалауында әсем безендіріліп, «Бірлік. Тұрақтылық. Жасампаздық» атауымен өткен форумға жастар, қала тұрғындары мен қонақтары қатысты. – Біз бүгін Елбасымыздың саясатын қолдайтынымызды, оның ең жа­қын командасында екенімізді көрсету үшін бас қосып отырмыз. Біз бірлік, тұрақтылық, жасампаздықты ту еткен «Нұр Отан» партиясына сенеміз! – деп саңқылдаған жүргізушілер жи­нал­ғандарға екпін бере түсті. Отан және туған жер, осы ұғымдарды жан-тәні­мен сүю бағытындағы патриоттық әндер әуелеген кеште «Жас Отан» ЖҚ мүшелері жалаушаларды көкке көтере тербетті. Халық алдына шыққан Маңғыстау облысының әкімі А.Айдарбаев, Маң­ғыстау облыстық мәслихатының хатшысы, «Нұр Отан» партиясы Маң­ғыстау облыстық филиалының сайлауалды өңірлік штабының төрағасы Б. Жүсіпов, Маңғыстау облысының құрметті азаматы, қоғам қайраткері Қ.Ережепов, Т.Шевченко атындағы украин этномәдени бірлестігінің мүшесі, «Ликоша» балабақ­ша­сы­ның меңгерушісі Т.Артеменко, Маңғыс­тау облысының кәсіподақтар орта­лы­­ғының төрағасы Қ.Жанабеков  Маңғыстау облысының тұрғындары мен қонақ­тарын «Нұр Отан» партия­сының сайлаудағы жеңісімен және Ұлыс­тың ұлы күні мейрамымен құттықтады. Форумның екінші бөлімі мерекелік көңілді кешке, яғни жергілікті өнерпаз­дардың концертіне ұласты. Гүлайым ШЫНТЕМІРҚЫЗЫ, «Егемен Қазақстан». * Ақтөбе Орталық сайлау комиссиясына ал­дын ала келіп түскен мәліметтерге сәйкес, науқанға қатысқан алты саяси партия­ның арасында үшеуі ғана тиісті  шекті бағындыра алды. Соның ішінде «Нұр Отан» партиясы сайлаушылардың 82,15 пайыз дауысын алғаны белгілі болып отыр. Осыған орай облыс орта­лығындағы ҚР Тұңғыш Президенті Н.Назарбаев атындағы орталық саябақта аймақтық жеңімпаздар форумы өткізілді. «Алға, Қазақстан, Алға «Нұр Отан»! «Нұрсұлтан – Қазақстан!» де­ген дауыстар Ақтөбе аспанын жаң­ғырт­ты. «Нұр Отан» партиясының жа­лау­шаларын бұл­ғап, жалауларын жел­біреткен жеңім­паздар қатары ауқымды. Саябаққа жи­нал­ған мыңдаған адамның жүздерінен жеңістің қуанышты лебі еседі. Сахна төрінен патриоттық әндер әуені төгіледі. Құбылмалы көк­темнің күні де шайдай ашылып, айна­лаға шуағын шашуда. Мұның өзі жеңіс қуанышымен астасып, көңіл көкжиегін кеңейте түседі. Алқалы жиында сөз алған облыс әкімі, «Нұр Отан» партиясы облыстық филиалының төрағасы Бердібек Сапар­баев форумға қатысушыларды «Нұр Отан» партиясының сайлаудағы айқын жеңісімен және Наурыз мейрамымен құттықтады. – Бұл сайлаудың басты ерекшелігі, оның жыл басы – Наурыз мерекесімен тұспа-тұс және ел Тәуелсіздігінің 25 жыл­дығы қарсаңында өтуі дер едім. Әлем­дік саяси және экономикалық дағ­дарысқа қарамастан халық бірлік пен татулықтың үлгісін көрсетті, сайлауға ұйымшылдықпен қатысты. Сайлаушылар өз болашағының Мемлекет басшысы Н.Назарбаевпен, Қазақстанның дамуы­мен және «Нұр Отан» партиясымен бір екенін тағы бір дәлелдеді. Ақтөбелік сайлаушылардың 80 пайыздан астамы «Нұр Отан» партиясын қолдап дауыс берді, Елбасы саясатына және еліміздің ертеңіне деген сенім артты. Бұл сіздердің Елбасының және мемлекеттің саясатын қолдайтындықтарыңыздың айқын көрінісі, – деді өңір басшысы. Форумда С.Бәйішев атындағы Ақтөбе университетінің департамент директоры Константин Цхай сөз алып, елдегі бере­ке-бірліктің Елба­сының сарабдал сая­сатынан бастау алатынын атап өтті. Ақтөбе хром қосын­дылары зауытының цех бас­ты­ғы Максим Мозговых форум­ға қаты­су­шыларды жұмысшылар аты­нан құт­тықтай келіп, 2017 жылдан бас­тап жұмысшы мамандығын таң­да­ған жастарға тегін кәсіптік білім бері­ле­тінін Елбасының көшбасшылық көре­гендігімен сабақтастырды. «Жас Отан» жастар қанаты облыстық филиа­лы­ның төрағасы Асылжан Бүркіталин жастарға жалынды қимыл жарасатынын жеткізді. Еңбек ардагері Серік Бота­ғарин, «Ақтөбе ферроқорытпа зауы­ты» АҚ ұнтақтаушысы Андрей Дронов, облыстық аурухананың бөлім мең­геру­шісі Айгүл Есірғожина және бас­қалары Қазақстанның одан әрі дамуы үшін өтк­ен сайлаудың маңызы зор екеніне жан-жақты тоқталды. Олар Елбасы Н.Назарбаевтың бастамасымен қолға алынған «100 нақты қадам» Ұлт Жоспары және бес институттық реформаны жүзеге асыруға өз үлестерін қосуға дайын екендіктерін мәлімдеді. Сатыбалды СӘУІРБАЙ, «Егемен Қазақстан». * Атырау Атырауда да «Нұр Отан» партиясы­ның мүшелері мен жақтастары жеңім­паздар форумын өткізді. Жеңімпаз пар­тияның мүшелері бұл өңірде еселеп өсіп келеді. Қазір өңірлік филиал құ­ра­­мында партияның 32 023 бел­сен­ді мүшесі бар. Олардың бәрі де пар­­тия бағ­дарламасының сәтті іске асуына атсалысуда. Жеңімпаздар фору­мына қатысушылар өңірде үде­мелі индустриялық-инно­вациялық жобалардың іске асырылып келе жатқанын қолдайды. «Нұр Отан» партиясының Аты­рау облыстық филиалы 27 сайлау ок­ругі бойынша облыстық мәсли­хат де­­пу­­­­таттығына әр сайлау округі­нен бір кан­­дидаттан ұсынды. Канди­дат­тар құ­рамында дәрігер мен заңгер де, кә­сіпкер мен мұнайшы да, тіпті, кәсіп­одақ ұйымының өкілі мен ауыл шаруа­­шылығы саласының білгір мама­ны да бар. – Бұл жеңіс – біз үшін үлкен жетістік. Біз елдің ықыласына бөленген, ел мүддесі үшін жұмыс жасайтын партия екенімізді тағы дәлелдедік. Он жеті жылдан бері партия Төрағасымен бірге ел тұрмысын жақсартуға атсалы­сып келе­міз. Сайлаудағы кезекті жеңісіміз «Нұр Отан» партиясының мүшелеріне үлкен жауапкершілік пен жаңа міндеттер жүктейді. Біз Елба­сы­ның бастауымен тәуелсіз еліміздің жаңа биіктерге көтеріліп, үлкен жетістіктерге жететініне сенеміз, – деді жеңімпаздар форумында «Нұр Отан» партиясы Атырау облыстық филиалы төрағасының орынбасары Кеңес Қосыбаев. Жолдасбек ШӨПЕҒҰЛ, «Егемен Қазақстан». *Көкшетау Қазақстан Тәуелсіздігінің 25 жыл­дығы аталып өтетін биылғы Наурыз мейрамын көкшеліктер көтеріңкі көңіл­мен, шат-шадыман думанмен той­лады. Ақмола облысының әкімі, «Нұр Отан» партиясы облыстық филиа­лының төрағасы Сергей Кулагин өңір тұрғындарын, қала қонақтарын бей­біт­шілік пен түсіністік, құт-береке мей­рамымен құттықтады. – Ағымдағы жылғы Наурыз – мей­рамын мерекелеу қоғамдық-саяси ма­ңызы зор оқиғамен, яғни Қазақ­стан Рес­публикасы Парламенті Мәжілісінің және барлық деңгейдегі мәслихаттардың сайлауымен тұспа-тұс келді. Кеше ғана біз сіздермен өз Конституциялық құ­қы­ғымызды пайдаланып сайлауға бел­с­ене қатыстық және бүкіл әлемге ауыз­бірлігіміз бен ынтымағымызды нақты іспен көрсете білдік. Бұл дегеніміз келі­сім мен жалпыұлттық бірлігіміздің жарқын көрінісі болып табылады. «Нұр Отан» партиясының облыстық филиалының төрағасы ретінде мен зор қуанышпен алдын ала сайлау мәліметтеріне сәйкес, «Нұр Отан» партиясының айқын басымдықпен жеңіске жеткенін айтқым келеді. Бұл жетекші партияның стратегиялық бағдарламасы қазақстандықтардың қолдауына ие болғанын білдіреді. Бұл тек «Нұр Отанның» жеңісі емес, бұл бүкіл халықтың жеңісі, – деп атап өтті партияның аймақтық филиалының төрағасы С.Кулагин. Тәуелсіздік алаңына «Нұр Отанның» Ақмола облыстық сайлауалды штабы­ның, бастауыш партия ұйым­да­ры­­ның мүшелері, белгілі қоғам қай­рат­керлері, партияның жақтастары, өнер саласындағы зиялылар, атақты спорт­шылар, қоғамдық пікір серке­лері, жастар, облыс орталығының тұр­ғын­дары сөз алып, демократиялық қоғамымыздың қарышты қадамына тілектестігін білдірді. Осы орайда, партияның өңірдегі сайлауалды 20 штабы, партия активі бекітілген жүйелік кестеге, респуб­ли­­ка­лық штабтың ұсыныстарына және Орталық сайлау комиссиясының күн­тізбелік іс-шаралар жоспарына сай қыруар жұмыстар атқарғанын атап өтуі­міз керек. Тұрғындар арасындағы үгіт-насихат жұмысы «ҚР сайлау ту­ралы» Заңының, халықаралық нор­­ма­лар талаптарының аясында жүр­гізіл­ді. Дайындық кезеңінде 414 мың адам­ды қамтыған, 2245 іс-шара ұйым­дас­ты­рылды. Бұл іске партияның 1250 белсенді мүшесі тартылған. Сон­дай-ақ, Парламент Мәжілісінің депу­тат­ты­ғынан партия тізімі бойынша үміт­кер­лер облыс аумағында 4500 адамды қам­титын 70-тен астам кездесуге қатысты. Бақберген АМАЛБЕК, «Егемен Қазақстан». Суретті түсірген Ермұрат Досымов. *Қарағанды  Қарағанды қаласында Қазақстан Респуб­ликасы Парламенті Мәжілісі мен барлық деңгейдегі мәслихаттар депутат­тарының кезектен тыс сайлауын­да ба­с­ым дауысқа ие болған жеңім­паз­­дар­дың форумы облыс әкімдігі алдындағы Тәуелсіздік алаңында өтті. Салтанатты жиынды ашқан облыс әкімі Нұрмұхамбет Әбдібеков жиылған қауымды сайлаудағы тарихи жеңіспен құттықтап, Қарағанды өңірінде бұл маңызы зор саяси шараның жоғары деңгейде ұйымдастырылып, демо­кра­тиялық талаптарға сай өткенін айтты. «Бұл жеңіс біздің қоғамның тұрақ­тылық пен өркендеуді, жарқын бола­шақты таңдағанын көрсетті, – деді өңір басшысы. – Ұзақ жолды бағындырдық, алда жаңа міндеттер тұр. Сондықтан да осы сайлауда елдің гүлденген ертеңі үшін ерікті түрде таңдау жасау аса маңызды болды». Жалпы, облыста сайлауға таңдаушы­лардың 79 пайызы қатысып, «Нұр Отан» партиясы айқын басымдықпен жеңіске жетті. Сайлаудың Арқа өңірінде заңға сай, ашық және әділ түрде өткенін халық­аралық байқаушылар да бірауыздан атап өтті. Мысалы, Қарағанды облысында халықаралық байқаушы ретінде жұмыс істеген Бүкілресейлік қоғамдық пікірді зерттеу орталығының бас директоры Валерий Федоров: «Қазақстандағы сайлау – халықтың өз қалауын еркін білдіруі», деген жоғары баға берді. Сонымен қатар, жеңімпаздар форум­дары облыстың басқа да ірі қала­лары мен аудан орталықтарында өтті. Мысалы, Жезқазған қаласында жеңімпаздар «Нұр Отан» партиясы ғимаратының алдына жиылып, салтанатты жиын ұйым­дастырды. Кешегі сайлауды жезқазғандықтар да жинақы өткізіп, дауыс беру шарасына тұрғындардың 79 пайызы қатысты. Жеңімпаз «Нұр Отан» партиясы болса 82,57 пайыз дауыс алып, ел ішінде абырой-беделге ие саяси күш екенін тағы бір мәрте дәлелдеді. Қарағанды қаласы мен облыстың басқа да өңірлерінде өткен жеңімпаздар форумында халық өзі сенім артқан партияның жеңісіне шын жүректен қуа­нып, жергілікті өнерпаздар дайындаған концертті тамашалап, аса көтеріңкі көңіл-күйде болды. Қайрат ӘБІЛДИНОВ, «Егемен Қазақстан». *Қостанай Биыл Наурызбен қатар келген Қазақ­стан Парламенті Мәжілісі мен барлық деңгейдегі мәслихаттар сайлауында бүкіл қазақстандықтар дауыс беріп, өз таңдауын жасады. Осы саяси бәсекеде «Нұр Отан» партиясының тағы да бәсі биік болды. Қостанайда Е.Өмірзақов атын­дағы облыстық филармонияның концерт залына өңірдегі партия мүше­лері, жастар, зиялы қауым өкілдері жиналып, партия жеңісін атап өтті. Алдымен жиналғандар кеше тікелей эфир арқылы берілген Орталық сайлау комиссиясының төрағасы Қуандық Тұрғанқұловтың мәлімдемесін тағы да қайталап тыңдады. Сайлау науқанына қатысқан алты партияның арасында «Нұр Отан» тағы қара үзіп, алға шықты. Сайлаудың алдын ала қорытындысы бойынша «Нұр Отан» партиясы барлық дауыстың 82,15 пайызына ие болды. Қостанай өңірінің тұрғындары да саяси науқанда белсенділік көрсетті. Орталық сайлау комиссиясының мәліметі бо­йынша, сайлау күні дауыс беру пайызы жағынан қостанайлық сайлаушылар түске дейін-ақ көш бастаған болатын. Жауып тұрған қарға, ауа райының қолайсыз, құбылуына қарамастан, облыс сайлаушыларының өте жоғары белсенділік танытқан жеңімпаз партия форумында облыс әкімі Архимед Мұхамбетов те атап өтті. – Саяси науқан – елдің бірлігіне сын. Ал біздің еліміз осы сайлауда тағы да өзінің біртұтастығын көрсете білді. Сай­лаудың алдын ала қорытындысы бо­йынша, облысымыздағы сайлаушы­лар­дың 82 пайызы «Нұр Отан» партиясына дауыс берген. Бүгінгі таңда «Нұр Отан» партиясының өңірде 68 мың мүшесі бар. Еліміздің жетекші саяси ұйымы осымен қатарынан үшінші рет айқын басымдықпен жеңіске жетіп отыр. Халық Елбасымызға, партияға, келешекке сенгендігінен осындай дұрыс, әділ таңдау жасады, – деді облыс әкімі Архимед Мұхамбетов. Мұнан кейін облыстық ардагерлер кеңесінің төрағасы Кенжебек Үкин, «Нұр Отан» партиясының мүшелері Ыбыраш Естаев, Алма Досжанова, Елена Данилова тағы басқалар осынау қуанышқа өз тілектерін қосты, жетек­ші партиямен еліміздің алға баса бе­ретіндігіне сенім білдірді. Өңір өнер­паз­дарының ән-жыры, би мен күйі «Нұр Отан» партиясының жеңісін сүйін­шілеп, шашу болып шашылды. Нәзира ЖӘРІМБЕТОВА, «Егемен Қазақстан». *Қызылорда Н.Бекежанов атындағы облыстық музыкалық драма театрында «Нұр Отан» партиясының жеңісіне арналған «Жеңімпаздар форумы» өтті. Форумда «Нұр Отан» партиясы Қы­зылорда облыстық филиалының төр­ағасы, облыс әкімі Қырымбек Көшер­баев бұл жеңіс төрткіл дүниеге еліміздің тұ­тастығын тағы да бір паш еткенін айтып өтті. Қызылордалықтардың 81,75 пайызы сайлауға қатысып, бұл жолы да ерекше белсенділік көрсетті. Таңдау жасалар сәтте облыс сайлаушыларының 82 пайыздан астамы өз сенімін жетекші партияға аманат етіп тапсырды. Сайлауда жеңіске жеткен жерлес­терін құттықтаған аймақ басшысы алтыншы шақырылған мәслихаттар құ­рамы мен құрылымына қатысты жаңа­лықтарды да атап өтті. Биылғы депутаттық құрамның 65 пайызы жаңарып отыр. Облыстық, қалалық, аудандық мәслихаттарға сай­ланған 147 депутаттың 23-і әйелдер қауымының өкілдері. Яғни, алдыңғы құраммен салыстырғанда әйелдер үлесі 9-дан 17 пайызға дейін, ал жастар үлесі бес есе өскен. Облыс басшысы жаңарып, жасарған құрамдағы халық қалаулылары белсенді жұмыс істеп, өңір экономикасы мен әлеуметтік дамуына тың серпін беретініне сенім білдірді. Мұнан кейін форумда Қазақстан Парламенті Мәжілісі депутаттығына «Нұр Отан» партиясы тізімі бойынша канд­идат Балайым Кесебаева, жергі­лік­ті мәслихаттағы жас депутаттар ара­сы­нан Тәуелсіздіктің құрдасы Ержан Жа­қыпов, Жаңақорған аудандық мәсли­хаты­­ның депутаты Зағипа Әб­жә­лелова сөз сөйлеп, жерлестерін сай­лау­дағы ай­қын жеңістерімен құттық­тап, еліміздің өсіп-өркендеуі жолында ма­ғыналы мақ­сат­тарды жүзеге асыруға күш-жігер­ле­рін аямайтынын жеткізді. Мұнан соң қаты­су­шылар шырқаған «Атамекен» әнімен форум аяқталды. Ержан БАЙТІЛЕС, «Егемен Қазақстан». * Орал Кеше Орал қаласындағы «Нұр Отан» саяси партиясы Батыс Қазақстан об­лыс­тық филиалы ғимаратының үл­­кен мәжіліс залы халыққа лық тол­ды. Мұнда Парламент Мәжілісі сай­лауында «Нұр Отан» партиясының ай­қын басымдықпен дауыс алуына бай­ла­нысты жеңімпаздар форумы өткізілді. Форумда алғашқы сөзді «Нұр Отан» партиясы Батыс Қазақ­стан облыстық филиалының төр­ағасы, облыс әкімі Нұрлан Ноғаев алып, барша Ақжайық жұртшылығына сай­лау күні көрсеткен белсенділігі үшін ризашылығын жеткізді, сөйтіп, оларды бүгінгі жарқын жеңісімен құттықтады. Соның ішінде «Нұр Отан» партиясының мерейі үстем түсіп отыр. Бұл барша Қазақстан халқының өзара бірлігі мен ынтымағының нәтижесі. Жасам­паздықтың жарқын жемісі. Сайлау алдында «Нұр Отан» партиясы жанынан құрылған сайлауалды штабтары мен қоғамдық ұйымдардың бірлескен іс-қимылының қорытындысы. Елімізде осындай жеңістер мен жетістіктер көп бола берсін, деді ол одан әрі. Бұдан кейін жеңімпаз партия өкіл­дерін құттықтаған қазақтың көрнекті ақын қызы Ақұштап Бақтыгереева бү­гінгі «Нұр Отан» партиясының сайлау­дағы жарқын жеңісі – елдіктің басты бір көрінісі мен үлгісі бола білгенін айтып берді. Барша әлемдік қауымдастыққа Қазақстан деген ел барын, ауызбіршілігі мықты қазақ деген мемлекет құраушы ұлт барын тағы бір мәрте паш еттік. Бұған Мәжіліс пен мәслихаттар сайлауына әлемнің түкпір-түкпірінен келген шет­елдік байқаушылар да көздерін жет­кізіп, оның әділ демократиялық сипа­тын айғақтап отыр. Халықтың көзі көре­ген. Халықтың көзі қырағы. Халық­тан асқан дана жоқ. Халқымыздың таң­дауы «Нұр Отанға» түсуі де оның осындай байқағыштығынан, оған сенім артуынан деп білемін. Еркін елдің ертеңі жастар. Сайлау күні мен олардың сайлау учаскелерінде көздері ұшқын атып жалындап жүргенін, осындай өршіл көңіл күйде урналарға сайлау бюл­летеньдерін тастағанын көріп қуан­дым. Ортақ жеңісіміз құтты болсын ағайын! – деп ағынан жарылды ақын апамыз. Форумда «Нұр Отан» партиясы Орал қалалық филиалы төрағасының бірінші орынбасары Дархан Қадыралиев елі­мізде орныға бастаған адами және қоғам­­­дық құндылықтардың Мәжіліс пен мәс­лихаттар сайлауын соны серпін­мен өт­кізуге әсері тигеніне тоқталды. Қазақ­стан халқы сайлау күні оң әрі дұ­рыс таңдау жасады. Бұл бәріміздің ор­тақ жеңісіміз, деп түйіндеді ол өз ойын. Сондай-ақ, «Нұр Отан» партиясы жанынан сайлау алдында құрылған қоғамдық штабтың мүшелері Салтанат Тұманбаева мен Лилия Хайруллина кешегі сайлау күні Тәуелсіздік туын биікке тағы бір жарқырата желбіретуге жол ашқанын жеткізді. Бұл күн алдағы ізгілікті істер мен тындырымды да тия­нақты мемлекеттік бағдарламаларды жүзеге асырудың және дағдарысты еркін еңсере білудің ақжолтай, бастамашы күні болып қалады, деді олар. Темір ҚҰСАЙЫН, «Егемен Қазақстан». Суретті түсірген Рафхат ХАЛЕЛОВ. *Өскемен Шығыс өңірі «Нұр Отан» пар­тия­­с­ының парламенттік сайлау­дағы жеңісіне шат-шадыман мереке­мен қол­дау көрсетті. «Бірлік! Тұрақ­ты­лық! Жасампаздық!» атты жеңім­паз­дардың өңірлік форумында шығыс­қазақстандықтар тәуелсіз һәм қуатты Қазақстанды құруға мүмкіндік беретін маңызды өзгерістерге қатысуға әр­қашан да әзір екендіктерін жеткізді. Өске­мендегі Абай ескерткішінің алдында облыс орталығының мыңдаған тұрғындары мен қонақтары қуаныш кернеген мерекелік көңіл-күймен бас қосты. Сайлаудың алдын ала шығарылған қорытындылары өңір тұрғындарының белсенділігін байқатып, «Нұр Отан» пар­тиясының халықтың жоғары қол­дауына ие болғанын көрсетті. Яғни, облыс халқының 82,44 пайызы Мәжіліс пен мәслихаттар сайлауына қатысты. Форум барысында еліміздің саяси ғұмырбаянындағы жаңа кезеңнің басталуымен бірге халықты һәм депутаттыққа сайланушыларды «Нұр Отан» партиясы Шығыс Қазақстан облыстық филиалының төрағасы, облыс әкімі Даниал Ахметов  құттықтады. – «Нұр Отан» партиясы – азамат­тар­дың әл-ауқаты мен елімізді әрі қарай дамытуға бағытталған Президент рефор­­маларының қозғаушы күші. Шығыс­­қазақстандықтар өз таңдауын жа­сай отырып, ұлы замандасымыз Нұрсұлтан Әбішұлы Назарбаевтың төңірегіне топтасты. Осылайша, Қазақ­стан­ды ауқымды түрде жаңғырту мін­деттерін шешуге әрдайым әзірлігін білдірді, – деді Даниал Ахметов. Сонымен бірге, өңір басшысы жерлестерді көктемнің көркем мерекесі – әз Наурызбен құттықтап, әр отбасыға бақыт пен шаттық тіледі. Айта кетелік, Республика алаңын­дағы іс-шарада арнайы киіз үйлер тігі­ліп, мерекелік сауда-саттық, спорт­тық жарыстар мен байқаулар өтті. Сондай-ақ, «Нұр Отан» партиясы тіккен киіз үйге келген тұрғындар жеңіс­пен құттықтап, ұлттық тағамнан дәм татты. Думан АНАШ, «Егемен Қазақстан». *Петропавл Облыс орталығындағы Спорт сара­йын­да өткен форумға «Нұр Отан» пар­тиясының мыңдаған қолдаушылары бас қосып, «Қазақстан! Нұрсұлтан! Нұр Отан!», «Алға, Қазақстан! Жаса, Нұр Отан!», «Бірлік. Тұрақтылық. Жасам­паздық!» деп ұрандатты. Еліміздегі жетекші саяси ұйым­ның Парламент Мәжілісі мен бар­лық деңгейдегі мәслихаттар депутат­тары­ның сайлауында айқын басым­дықпен жеңіске жетуіне орай ұйым­да­стырылған айтулы шарада аймақ бас­шысы, «Нұр Отан» партиясы СҚОФ төрағасы Ерік Сұлтанов жи­нал­ғандарға жалынды сөз арнады. «Бәріңізді Елбасы Нұрсұлтан Назарбаев Төрағасы болып табылатын партияның ортақ жеңісімен құттықтаймын. Пре­зидент халық бірлігін нығайту, тұрақ­тылықты сақтау, экономикалық өсімді қамтамасыз ету бағдарламаларын ұсын­ғанын, бұл мәселелердің саяси ұйымның тұғырнамасында айқын бел­гіленгенін бәріңіз жақсы біле­сіз­дер», дей келіп, Ерік Хамзаұлы сол­түс­тікқазақстандықтардың үлкен жауап­кершілік пен саяси белсенділік таныт­қандарына ризашылық білдірді. Форумда облыстың құрметті аза­ма­ты Құдайберген Қалиев, «Мәм­бетов және К» командиттік серік­тес­ті­­гінің атқару­шы директоры Арыс­тан Жүнісов, Сол­түстік Қазақстан гума­ни­­тарлық-тех­ни­калық колледжінің ди­ректоры Алек­сандр Мерк, облыстық балалар ауру­ханасының бас дәрігері Олег Завьялов, «Вода хрустальная» ЖШС директоры Александр Казанцев, «Қоғамдық келісім» мемлекеттік кәсіп­орнының директоры Әсемгүл Есқожа, М.Қозыбаев атындағы СҚМУ студенті Екатерина Старостина сөз сөй­леп, шын көңілден шыққан жүрек­жарды тілектерін жолдады. Жиын соңы жергілікті көрке­мө­нер­паздардың концерттік бағдарлама­сына ұласып, патриоттық рухтағы әсем әндермен көмкерілді. Өмір ЕСҚАЛИ, «Егемен Қазақстан». *Тараз Халқымыздың әлем алдындағы абы­ройын тағы бір асқақтатқан сайлау Ұлыстың ұлы күні – Наурыз мейрамымен тұспа-тұс келді. Қазақстан Республикасы Парламент Мәжілісінің кезектен тыс сайлауында барша отандастарымыз өз таңдауын жасады. «Нұр Отан» партиясы үлкен нәтижелермен жеңіске жетті. «Нұр Отанның» жеңісі – Қазақстанның кезекті биік белесі. Барша қазақстандықтар сияқты, жам­былдықтар да «Нұр Отан» партиясының күш-жігері мен болашақ жоспарларын  қолдайтынын білдірді. Осыған байланысты кеше Тараз қала­сында «Бірлік! Тұрақтылық! Жасампаз­дық!» атты жеңімпаздар форумы өтті. Форумда мәдениет қайраткері, Тараз қаласы мен Талас ауданының құрметті азаматы Әлібек Әмзеұлы, «Айвенго» ЖШС директоры Любовь Попова, сонымен қатар, жас ақын Бегайдар Аманбаев, «Қазфосфат» ЖШС сары фосфор өндіру цехының  аппаратшысы Александр Пя сөз сөйлеп, «Нұр Отан» партиясымен бірге еліміздің де еңсесі биіктей беретінін паш етті. – Болашағымыздың жарқын екеніне күмәніміз жоқ. Өйткені, халқымыз Ел­басы­ның дана да дара саясаты арқа­сында тыныш, аспаны ашық, тамаша елде өмір сүріп жатыр. Қазақстанның әлеуметтік-экономикалық, өндірістік салада, халықаралық аренада қол жеткізген үлкен табыстарында «Нұр Отан» партиясының да елеулі үлесі бар деп білеміз, – деді Жамбыл облысының әкімі Кәрім Көкірекбаев. Шынында, «Нұр Отан» партиясының мақсаты – бір болу, бірге болу, ұлтқа қамқор, ұрпаққа қорған болу. Ендеше, барша қазақстандықтарға ортақ жеңіс құтты болсын! Тәуелсіздігіміз баянды, мемлекетіміз мәңгі, еңселі еліміздің келешегі жарқын болғай! Форумның соңы концерттік бағдар­ламаға ұласты. Оралхан ДӘУІТ, «Егемен Қазақстан». * Талдықорған Орталық алаң төрінде сары, көк түсті маталар «Бірлік! Тұрақтылық! Жасампаздық!» деген жазулармен желбірейді. Бұл «Нұр Отан» партия­сының Парламент Мәжілісі мен барлық деңгейдегі мәслихаттар депу­таттарының сайлауында жеңіске жеткендігін айтқызбай-ақ аңғартып тұр. Осы қуанышын елмен бөлісу үшін нұротандықтар жалпыхалықтық салтанатты басқосу ұйымдастырды. Табиғат-Ана да бұл шаттықты құп көргендей, жадырай жылылық сеуіп тұр. Күн мен түн теңелетін осы тәулік­тің үлкен қуанышын бөліскен жамиғат та шат. Әз Наурыздың алғашқы күнін Жетісу халқы осылай қарсы алып, қазақы даналықпен «қуанышты бөліс­се көбейеді» деген тәмсілді өзара айтысуда. Сахна төріне шығып алғашқы сөзді алған «Нұр Отан» партиясы саяси кеңесінің мүшесі, Алматы облысы әкімінің орынбасары Бақтияр Өнербаев ерекше екпінмен, көңілдерге қуаныш толтыра, саяси науқанда ел өз таңдауын жасағандығын айта келіп, Парламент Мәжілісінің депутаттығына сайлауға түскен 124 нұротандықтың 10-ы Ал­маты облысынан қосылғандығына тоқ­тал­ды. Әрине, бұл жеңіс сайлауалды үгіт-насихат жұмысының заңнама тала­бына сай, жоспарлы түрде атқа­рылған­дығынан да ел құлағдар етілді. Келесі кезекте, жеңімпаз партия атынан Дина Нұрпейісова, жастар өкілі Сағи Атамханов, Қазақстан халқы Ассамблеясы атынан Наталья Белых, ғалым Саида Сәдуақасова және басқа белсенділер «Нұр Отан» партиясының барлық мүшелерін жеңіспен құттықтады. Сөйтіп, талдықорғандықтар ел тыныш­тығы бірлігі, татулығы үшін күні кеше аза­маттық парызын өтеп, «Нұр Отан» партиясын жақтап дауыс бер­ген­діктеріне разы бола, ең бастысы, жақсы жетістікке жеткеніне қуана тарасты. Нұрбол ӘЛДІБАЕВ, «Егемен Қазақстан». *Шымкент Шымкенттегі жеңіл атлетика мане­жінде «Нұр Отан» партиясы Оң­түс­тік Қазақстан филиалының ұйым­дастыруымен жеңімпаздар форумы өтті. LED экран ар­қылы сөз сөйлеген Орталық сайлау комис­сиясының төрағасы Қуандық Тұрғанқұлов сайлау қорытындысын жария етті. – «Нұр Отан» – халықтық партия. Оның осы сайлауда жеңіске еркін жете­тініне ешкімнің шүбәсі болған жоқ, – дейді «ОҚО Азаматтық альянсы» заң­ды тұлғалар бірлестігінің төрағасы, облыстық мәслихаттың депутаты Шә­ріп­бек Жамалбеков. – Бұл сайлау додасында «Нұр Отан» 82,15 пайыз дауыс жинап, мәреге шашасына шаң жұқпай жетті. Жеңіске жету бар, мойынға алған жауапкершілікті аяғына жеткізіп орындау және бар. Бұл халықтық партияға айналған «Нұр Отанның» қолынан келеді. Салтанатты шарада мінбеге көтеріл­ген облыс әкімі Бейбіт Атамқұлов жұртшылықты шынайы жеңісімен құттықтады. Облыста 1029 сайлау учаскесі жұ­мыс жасады. Дауыс беруге құқығы бар 1 317 255 сайлаушы тіркелген. Ел үшін үлкен маңызы бар шарада оң­түстікқазақстандықтар үлкен ұйым­шылдық танытып, 85,06 пайыз дауыс берді. Бұл Қазақстанның барша облыс, қалаларымен салыстырғанда жақсы көрсеткіш. Осы деректерді тілге тиек еткен облыс басшысы: – Сайлауда «Нұр Отан» партиясы ең көп дауыс жинады. Демек, біздің тұрақтылықты, дамуды таңдады. «Нұр Отан» партиясына дауыс беру арқылы Елбасы саясатын қолдайтындықтарын кезекті рет көрсетті. «Нұр Отанның» жеңісі – бүкіл елдің ортақ жеңісі! – деді. Форумда ел ағалары, «Нұр Отан» партия­сы атынан сайлауға түсіп жеңіс­ке жеткен депутаттар, этномәдени бір­­лестіктер өкілдері және жастар сөз алып, бұл жеңістің заңды екендігін, «Нұр Отан» партиясы халықтық пар­тияға ай­нал­ғандығының жемісі екен­дігін айтты. Жиында Шәмші Қалдаяқов атын­дағы облыстық филармонияның әнші­лері мен бишілері өнер шуағын шашты. Бұл сайлау барша қазақстандықтар сияқты, оңтүстік тұрғындарының да көшбасшы партияға бар үмітін жалғап отырғандығын тағы да байқатты. Бақтияр ТАЙЖАН, «Егемен Қазақстан».