Жаңа коалицияға кіруге шақырды

«Нұр Отан» халықтық-демократиялық партиясы «Қазақ­стан-2020» жалпыұлттық демократиялық күштер коалициясын құру туралы бастама көтерді. Бұл туралы партия Төрағасының бірінші орынбасары Нұрлан Нығматулин 12 қаңтарда Орталық аппаратта өткен брифингте мәлім етті. «Бүгін «Нұр Отан» халық­тық-демократиялық партиясы Ел­басымыз Нұрсұлтан Әбіш­ұлы Назарбаевтың өкілеттігін ұзарту бастамасы бойынша референдум өткізу үшін «Қазақ­стан-2020» демократиялық күш­­тер коалициясын ұйым­дас­ты­рып отыр. Бұл коалиция Пре­зидентіміздің өкілеттігін ұзарту бастамасы бойынша референдум өткізуді қолдап және осы референдумды жүзеге асыруға байланысты барлық шараларды қолға алатын болады. Сол себептен, біз еліміздегі барлық саяси партияларды және қоғамдық ұйымдарды осы коалицияға кіруге шақырамыз», – деді өз сөзінде Нұрлан Нығматулин. Ал коалицияны құруға еліміз бойынша миллиондаған қазақ­ста­ндықтар қолдаған Қазақстан Рес­публикасының Тұңғыш П­ре­зиденті Нұрсұлтан Назар­баев­тың өкілеттігін 2020 жылға дейін ұзарту бойынша жал­пы­халықтық референдум өткізу туралы бастама себеп болып отыр. Бүгінгі күні рефе­рен­дум­ды қолдап 5 млн. адам қол қойған. Коалицияны құруға ұйытқы болғандар Қазақстанды жаңар­тудың 10 жылдық бағдар­ла­ма­сын жүзеге асыру үшін барлық қазақстандықтардың бірігуі, бар күшті бір арнаға топ­тас­тыруы ауадай қажет деп біледі. Ал жүктелген тапсырмаларды табысты орындау – ол тікелей жаңа стратегиялық бағдардың жебеушісі ғана емес, мемле­ке­тіміздің одан әрі дамуының кепілі саналатын Елбасымыз Нұрсұлтан Назарбаевтың аты­мен байланысты екені сөзсіз. Демек, жалпыұлттық коали­ция­ның құрылуы референдум идея­сын қолдау үрдісіне тың серпін беруге қабілетті бол­мақ. Брифингке құрамында саясаткерлер, зиялы қауым өкіл­дері, журналистер бар еліміздің танымал қайраткерлері қа­тысты. «Егемен-ақпарат».