«Алтай» волейбол клубы

жаңа жаңғыру жолына түсті Шығыс Қазақстан облы­сының «Алтай» волейбол клубы тұңғыш рет Қазақстан ұлттық лигасының чемпионы атанды. Облыс орта­лығында бір аптаға созылған ұлт­тық лиганың ерлер командалары арасындағы Геннадий Гончаровты еске алуға арналған ел чемпионатының төр­тінші айналым ойындары барысында үздік шыққан Өскемен клубы жерлестерінің ризашылығына бөленді. Ел біріншілігін ұтқан «Алтай» клубы Азия чемпионатына шықты. Аталған матчты өңір басшысы Даниал Ахметов тамашалады. Өткен жылы өңір басшы­сының тапсырмасы бойынша, Өскемен мен Семей қалала­ры­ның волейбол командалары біріктірілген болатын. Осы арқылы бюджетті үнемдеуге ғана емес, жақсы нәтижелер көр­сетуге де қол жеткізілгенін бай­қауға болады. «Алтай» клубының бас жаттықтырушысы Игорь Николь­ченконың айтуынша, бүгінде волей­болшылардың сәтті ойын көрсетуіне барлық жағ­дай жасалып отыр. Жаттық­тырушылар мен жерлестерінің білдірген сенімін ақтау үшін шығысқазақстандық волейболшылар әр ойында жеңіске жетуге бар күш-жігерін жұмсап келеді. – Екі клубты біріктіру арқылы біз ең үздік волейболшыларды іріктедік. Қаржымызды үнемдеуге қол жеткіздік. Жер­лестеріміз өз күш-жігерін ортақ мақсатқа бі­рік­тіруінің нәтижесінде үлкен та­быс­тарға жете бастады. Күрделі жұ­мыстың алғашқы нәтижесі, Шығыс Қазақстан облысының өз тарихында алғаш рет ұлттық чем­­пио­натта топ жаруы дер едім. Дәл осы іспетті жүйемен «Алтай» футбол клубы да жұмыс істеуде. Келесі маусымда футболда да жа­ңа биіктерді бағындырамыз деп үміттенемін, – деді облыстық спорт және денешынықтыру бас­қар­масының басшысы Елдос Шікенов. Қазіргі кезде жеңімпаз команда Азия чемпионатына қызу әзірлік үстінде. Волейболдан 16 команда қатысатын құрлықтық бәсеке Мьянме қаласында 23-31 тамыз аралығында өтеді. Думан АНАШ, «Егемен Қазақстан». ӨСКЕМЕН.