Дүниежүзілік банкпен байланыс баянды

Кеше Парламент Сенатының Төрағасы Қасым-Жомарт Тоқаевтың төрағалық етуімен осы палатаның отырысы болды, деп хабарлады Сенаттың баспасөз қызметі. Палата Қазақстан Респуб­лика­сының Үкіметі мен Ха­лықар­алық Қайта Құру және Даму Банкі арасындағы Қазақ­­стан Республикасында офис­тер құру және олардың жұмыс істеуі туралы келісімді ратифи­кациялады. 2016 жылғы 21 қаңтарда Давоста жасалған келі­сім Астана және Алматы қала­ларында Халықаралық Қайта Құру және Даму Банкінің (Дүние­жүзілік банк) офистерін құру мен олардың жұмыс істеу тәртібін белгілейді. Ратификацияланған құжат 1994 жылғы 23 мамырдағы Алматы қаласында Тұрақты өкілдік құру туралы шартты алмас­тырады. 2001 жылдан бастап, Дүниежүзілік банктің өкілдігі Астанада жұмыс істей­тіні, ал Алматы кеңсесі осы қар­жы институтының Орталық Азия­дағы аймақтық өкілдігі мәрте­бесін алғаны белгілі. Жаңа келісім Дүниежүзілік банктің Қазақстан Республикасындағы офистері мен қызметкерлерінің мәртебесін, артықшылықтары мен иммунитеттерін айқындайды. Мәселен, Дүниежүзілік банк, оның активтері, меншігі мен табысы, сондай-ақ, қызметі мен транзакция­лары салықтар мен кедендік баждар салуға жатпайды. Сондай-ақ, келісім ком­муникацияларға, импорт пен экспортқа қатысты, сондай-ақ, сот процесінен де ар­тық­шы­лықтар мен иммунитеттерді көздейді. Сенат басқа жұмысқа ауысуына байланысты депутат Ләззат Тұрлашовтың өкілеттігін тоқтату туралы қаулы қа­былдады. Қ.Тоқаев Л.Тұрлашовқа заң шығару қызметіне табысты қатысқаны үшін парламентшілер атынан алғыс айтып, Алматы облысы әкімінің бірінші орынбасары лауазымында жемісті қызмет етуіне тілектестігін білдірді. Отырыс барысында сенаторлардың депутаттық сауалдары жария етілді. Депутат Сәрсенбай Еңсегенов Балық ша­ру­ашылығы институтының өзекті мәселелері бойынша Ауыл шаруашылығы министрі Асылжан Мамытбековке сауал жолдады. Сенатор Бектас Бекназаров жолда жүру ережесін бұзғаны үшін жазаны қатайту туралы сауалын Премьер-Министр Кәрім Мәсімов пен Бас Про­курор Асхат Дауылбаевқа арнады. Депутат Қуаныш Айтаханов Пре­мьер-Министрге екі сауал жария етті. Олар Оңтүстік Қазақстан облысындағы Шәуілдір алқабының ішкі арналық-құрғату жүйесін жаңғыртуға және Отырар ауданындағы суаратын жердің мелиоративтік жағдайын жақсарту жобасын халықаралық қаржы инс­титуттарының қаржысы есебінен қаржы­ландыруға қатысты болды.