Жуырда Астанадағы Елбасы кітапханасында 5-10 сынып оқушылары арасындағы Қазақстан тарихынан XІ республикалық «Тарих ата» қашықтық олимпиадасының салтанатты жабылу рәсімі өтті.
Атап айтар болсақ, аталмыш сайысқа Қазақстанның барлық өңірінен 1624 оқушы қатысты. Олимпиада қашықтық және қорытынды екі кезең бойынша өткізілді. Нәтижесінде 148 жеңімпаз анықталып, қорытынды кезеңге шақырылды. 5-10 сынып оқушылары Қазақстан тарихы бойынша тест тапсырмаларын орындаса, 8-10 сынып арасында ең жоғары ұпай жинаған қатысушылар Қазақстан тарихы бойынша өзекті тақырыптарға эссе жазды.
Осы жылғы олимпиаданың бір ерекшелігі, Қазақстан Республикасының Тұңғыш Президенті – Елбасы кітапханасымен бірлесіп өткізілуінде болып отыр. Шараға қатысушылар Қазақстан Республикасының Президенті, Ұлт Көшбасшысы Н.Ә.Назарбаев туралы деректі фильмді тамашалады. Кітапхананы аралап, «Әлемді өзгертетін идеялар» интерактивті білім беру кешені арқылы Елбасының идеяларымен және бастамаларымен жақынырақ танысты. Сонымен қатар, Білім және ғылым министрлігі Мемлекеттік тарих институтының директоры, тарих ғылымдарының докторы, профессор Б.Аяғанмен кездесті.
Шара соңында олимпиаданың жеңімпаз жүлдегерлері Білім және ғылым министрлігінің «Дарын» республикалық ғылыми-практикалық орталығының I, II, III дәрежелі диплом, грамоталарымен марапатталды. Сонымен қоса, жеңімпаз оқушыларға «Ойлар мен жылдар» және «Біздің Президент» атты тағылымы мол кітаптар сыйға тартылды.
Раушан ТӘУІРХАНҚЫЗЫ,
«Егемен Қазақстан»