Шымкенттік кәсіпкер Гаджи Гаджиев мықтылығы сол, Бразилиядан жұпар иісті дәнді Оңтүстіктің жеріне жерсіндіріп, дайын өнім алып жатыр. Оның ойын жүзеге асыруға «Бизнестің жол картасы-2020» бағдарламасы көмектесті. Өсімі 14 пайыз несиенің жартысын мемлекет мойнына алды. Бизнесмен 30 млн. теңгеге сатып алынған қондырғы кофенің «Арабика» деп аталатын түрін дайындайды.
Бастапқыда кәсіпкер біраз шығынға ұшыраған. Өйткені, дәнді қыздырғанда қажетті ыстықтан асып кетсе күйіп кетеді. Хош иісі бұзылады. Қазір өндірістік кооперативтің мүшелері кофе қуыруға маманданып алды. Күніге 500 килоға дейін дайын өнім алады. Мысалы, кофені Италиядан немесе басқа жақтан әкеліп, оны өңдеп жасап шыққанша, қанша уақыт кетеді. Оған арадағы тасымалын қосыңыз.
– Ал біз шикізатты тікелей осы жерде өңдеп жатырмыз. Сондықтан толықтай Қазақстанда өңделген өнім деп айтуға болады. Тағы бір артықшылығы, қапқа оралған соң тұтынушының қолына жеткізіледі. Оның бағасы да қарапайым халықтың қалтасына тиімді болады деп ойлаймын, – дейді өндірістік кооператив төрағасы Гаджи Гаджиев.
Келешекте кооператив өз өнімін көрші елдерге де экспортқа шығармақшы.
Бақтияр ТАЙЖАН,
«Егемен Қазақстан»
Оңтүстік Қазақстан облысы