Латын әліпбиі – ғылым мен техниканың, ғаламтор мен жаңа технологиялар тілі. Латын әліпбиіне көшу бүгінгі жүрісі жылдам заман талабы. Кезінде жаппай компьютерлендіру үрдісін де аға буын – біз, бір қорқынышпен, жылдам игеріп кете алмаймыз ба деген сенімсіздікпен қабыл алған болатынбыз. Ал қазір компьютер тілін пайдаланушы деңгейінде білмейтін адам жоқ шығар. Сондықтан латын әліпбиін де тез игеріп кетеміз деп ойлаймын. Латын әліпбиінің бірнеше нұсқалары ұсынылып, ең тиімдісі, халыққа игеріп кетуге ыңғайлысы қабылданбақ.
Алдыңғы 25 әріптен тұратын, қазақтың төл дыбыстарын диграфтармен берген нұсқасы халық тарапынан көп сынға ұшырады. Себебі төрт-ақ әріптен тұратын «өзің» деген қазақтың төл дыбыстары бар қысқа сөздерді жазу үшін алты немесе одан да көп әріппен жазуға тура келер еді. Ал көпшіліктің пікірімен санасып жасалған, 32 әріптен тұратын соңғы нұсқадағы латын әліпбиінде барлық қазақ тіліне тән дыбыстар сақталып отыр. Осы нұсқа қолданысқа енсе қиындық тудырмайды деп ойлаймын.
Баянгүл ҚОЖАХМЕТОВА,
С.Торайғыров атындағы Павлодар мемлекеттік университеті Қазақ тілі мен журналистика кафедрасының аға оқытушысы
