Коллажды жасаған Зәуреш СМАҒҰЛ, «EQ»
Келесі жылдан бастап жастар 2,5 пайыздық мөлшерлемемен несие ала алады. Мемлекет басшысының тапсырмасына сәйкес Үкімет жастардың кәсіпкерлік ынтасын көтеру және қолдау мақсатында шағын несие беру әдістерін қарастырып жатыр.
– 2023 жылдың 1 қаңтарынан бастап жастарға шағын несие беріледі. Оның пайыздық мөлшері 2,5%-ды құрайды. Қазіргі кезде ережелер жобасы жасалып, «Ашық НҚА» порталында жарияланды. Басты шарты – кепілдік мүлік болуға тиіс. Оның үй болуы міндетті емес, бағалануы тең басқа да мүлік болуы мүмкін. Несие мөлшері – 5 млн теңгеге дейін. Берілу мерзімі – 5 жылға дейін. Егер несие ауыл шаруашылығына немесе ірі қара мал, жылқы асырауға алынса, онда 7 жылға дейін беріледі. Несие алған жастарға 1,5 жылға «каникул кезеңі» ұсынылады, яғни аталған уақытта олар ай сайынғы жарна төлеуден босатылады, – деді Еңбек және халықты әлеуметтік қорғау министрлігі Халықты жұмыспен қамту департаментінің директоры Асқар Ниязов.
Шағын несие жастардың кәсіпкерлік бастамаларын дамытуға арналған. Үкімет келесі жылы оған 5,8 мың жас қол жеткізеді деп жоспарлап отыр.
– Мемлекет жастарды жұмыспен қамту мәселесіне ерекше назар аудара бастады. Атап айтсақ, жыл сайын «Жастар практикасы», «Алғашқы жұмыс орны», «Жеңілдікпен несиелеу» және «Дипломмен – ауылға!» бағдарламалары сияқты жобаларды іске асыру шеңберінде республика бойынша 100 мыңға жуық жас жұмыспен қамтылады. Халықты еңбекпен қамтудың тағы бір құралы – нарық сұранысына қарай жастарды қысқа мерзімде оқыту. Аталған жобаның аясында олар жаңа мамандық меңгеріп, оқу аяқталғаннан кейін жұмысқа орналаса алады. Жыл басынан бері 35,2 мың адам оқытылды, – деді Еңбек және халықты әлеуметтік қорғау вице-министрі Олжас Ордабаев.
Жалпы, елде субсидияланатын жұмыс орындарымен қамтылған 161 мыңға жуық азаматтың 36 пайызын жастар құрайды. Оларға жалақы мемлекет тарапынан ішінара немесе толықтай төленеді. Егер жұмыс берушінің белгіленген талаптарына сай келетін болса, жастар кәсіпорындарда жұмысқа орналаса алады. Ол үшін Еңбек биржасы арқылы қажетті орындарға өтініш беру керек.
– Қазір субсидияланатын жұмыс орындарымен қамтылған 161 мыңға жуық азаматтың 36%-ын жастар құрайды. Мұндай жұмыс орындарының негізгі мақсаты – жастардың нақты машықтары мен дағдыларын игеріп, одан әрі тұрақты жұмысқа орналастыру. Бүгінде жастарды жұмыспен қамту бірнеше бағыт бойынша жүзеге асырылып келеді. Олардың ішінде «Жастар практикасы», «Алғашқы жұмыс орны», «Ұрпақтар келісімшарты», «Қоғамдық жұмыс» сияқты жобалар көзделген. Бұл жобалар жасы 29-дан аспаған жоғары оқу орнының түлектері немесе жұмыс тәжірибесі жоқ NEET санатындағы жастарды жұмысқа орналастыруға бағытталған, – деді вице-министр.
