01 Наурыз, 2016

Қос шара – бір мүдде

219 рет көрсетілді
IMG_7649«ҚазМұнайГаз» ұлттық компаниясы» АҚ-тың Астанадағы бас кеңсесі орналасқан ғимаратта жуырда екі бірдей елеулі шара өтті. Оның бірі – акционерлік қоғамның басқарма төрағасы Сауат Мыңбаевтың «Үздік маман» байқауының жеңімпаздарымен кездесуі болса, екіншісі – «ҚазМұнайГаз» ҰК» АҚ жас мамандарының өткен жылы басталған үздік инновациялық жобалары байқауының мәреге жетуіне байланыс­ты марапаттау рәсімі. Кездесуді жүргізген «ҚазМұнайГаз» АҚ адам ресурс­тарын басқару және еңбекақы төлеу жөніндегі басқарушы директоры Серік Әбденов «Үздік маман» байқауының ҚМГ компаниялар тобы арасында жыл сайын өткізіліп келе жатқанын атап өтті. Өткен жылы «ҚазМұнайГаз» компаниялар тобы 16 ком­паниясының қызметкерлері кәсіби біліктіліктері бойынша сынға түскен. Олардың арасында «ҚазМұнайГаз» Барлау Өндіру» АҚ пен оның еншілес кәсіпорындары, «ҚазТрансОйл» АҚ, «Маңғыстаумұнайгаз» АҚ, «ҚазТрансГаз» АҚ, «ҚазМұнайГаз-Сервис» ЖШС, «KMG-Security» ЖШС, «Ақтаумұнайсервис» АҚ және басқа да ұйымдар бар. «Байқау барысында оператор, электромонтер, слесарь және дәнекерлеуші сынды оннан астам мамандықтар бойынша үздіктер анықталды. Қатысушылар өз­дерінің күнделікті атқарып жүр­ген жұмыстарын теориялық және тәжірибелік жағынан көрсетуге мүмкіндік алды. Жеңім­паз­дарды анықтаудағы бас­ты өл­шем ретінде олардың кәсіби машығы, тапсырмаларды орындау жылдамдығы мен қауіпсіздік техникасын сақтауы назарға алынды. Жеңімпаздарға ынталандыру ретінде медальдар мен мақтау қағаздар, сондай-ақ еңбекақыға үстеме қаржылай сыйақы берілді. Жалпы, байқауға келетін болсақ, «ҚазМұнайГазға» қарасты мекемелердің ішінде «Үздік маман» өндірістік кәсіби байқауларын өткізу дәстүрге айналған, әрі бұл сайыстың 18 жылдан бері өткізіліп келе жатқандығына қарамастан, ма­ңызы жылдан-жылға артып келе жатыр. Бұл – қуантарлық жайт. Сондай-ақ, атап өту керек, өткен жылы «ТрансГазПайплайн» ком­паниясының ұйымдастыруымен Қытай Халық Республикасының Дэчжоу қаласында өткен үздік мамандар сайысына «Азиялық газ құбыры» мекемесінің командалары қатысып, жүлделі орындарға ие болды», деген модератор түрлі аталымдар бойынша байқауда жеңімпаз атанған 17 үздік маманды таныстырып өтті. «ҚазМұнайГаз» ҰК» АҚ басқарма төрағасы Сауат Мың­баев кездесуге келген жеңім­паздарды құттықтап, біршама ой-пікірлерімен бөлісті. «Өз ісінің үздігі» атанған сіздермен кездескеніме қуаныштымын. Жеңістеріңіз құтты болсын! Елдің әлеуметтік-экономикалық дамуына қызмет етіп келе жат­қандарыңыз үшін алғысымды білдіргім келеді. 80 мыңға жуық жұмысшы мамандардың арасынан үздік атану үлкен мәртебе деп есептеймін. Жалпы, «Үздік маман» байқауының жеңімпаздарына компания басшылығы тарапынан үлкен көңіл бөлінуде. Бұл бағытта алдағы уақытта да жүйе­лі жұмыстар жүргізу жоспарлануда», деді ол. С.Мыңбаев өз сөзінде ком­па­ния үшін қызметкерлер мен олардың шеберлік таланты табысты бизнестің басты көрсеткіші болып саналатынын, сондықтан «ҚазМұнайГаз» өз қызметкерлерін маңызды ресурс ретінде қарастырып, олардың тұрмысы мен еңбек жағдайларын жақсарту саясатын жүргізіп келе жатқанын атап өтті. Бұл күнде компанияда еңбек-әлеуметтік қарым-қатынас бойынша бірегей стандарт енгізу мақсатында жұмыстар атқарылып жатыр. Өткен 2015 жылы «ҚазМұнайГаз» компаниясында жұмысшылар тобын әлеуметтік қолдау бойынша типтік ереже жұмыс істей бастаған. Ал, «ҚазМұнайГаз» Барлау Өндіру» АҚ компаниялары арасында биз­нес-бағыт бойынша еңбекті әділ сыйақымен қамтамасыз ету мақсатында бірыңғай еңбекақы жүйесі енгізіліп, нәтижесінде бірдей мамандықтар үшін тариф­тік коэффициенттер біріз­дендірілген. «Сіздер білесіздер, әлемдік дағдарысқа және мұнай баға­сының тұрақсыздығына байланысты біздің сала үлкен қиын­дықты бастан кешіруде. Бірақ қандай қиын жағдай болса да, ҚМГ өндірістік кәсіпорындары еңбекақыға жүйелі түрде индексация жүргізеді. Әлеуметтік қолдаудың ағымдық деңгейін сақтап отырады. Бұл ҚМГ компаниялар тобының көбінде бизнес-бағыт бойынша жеткен оң нәтижесіне сәйкес мүмкін болуда. Атап өту керек, бұл сондай-ақ, басшылықтың, жұмысшылардың және кәсіподақтардың үйлесімді әрі кәсіби жүмысының да заңды нәтижесі», деді С.Мыңбаев. Ағымдағы жылы еліміздің мұнай саласы жаңа сын-қатер­лерге бетпе-бет келуі мүмкін. Әлемдік экономикадағы соң­ғы трендтер солай дегізеді. «ҚазМұнайГаздың» болашағы да мұнай бағасына тәуелді. Мұнай бағасының түсуі қаржылық-шаруашылық қызметтің құлды­рауына алып келуі мүмкін. Елбасы Н.Назарбаевтың соңғы кезде әрдайым ішкі қорларды іздестіру қажеттігі туралы ойлары да назар аудартады. Ол өндірістің тиімділігін арттырып, әр маманның өз орнында жауапкершілігін арттыру қажеттігін де атап өткен болатын. Әрине, тек дағдарысты сыл­тауратып, ауызды қу шөппен сүртіп отырудың орынсыз екенін қазір әркім де шамалайды. Бұл орайда «ҚазМұнайГаз» ҰК» АҚ қандай шаралар атқарып жатыр деген сауалдың төбесі көрінеді. Кездесу барысында басқарма төрағасы өткен жылы басталған бизнесті трансформациялау бағдарламасынан компания үлкен үміт күтетінін тілге тиек етті. Үздік мамандарға трансформацияның не екенін былайша түсіндірді. «Трансформация дегеніміз – шы­ғындарды немесе қызметшілерді қысқартуды мақсат ететін қай­та құрылымдау емес. Сіздер оны нақты түсінулеріңіз керек. Бұл компанияның әрбір жұ­мысшысының еңбегіне бағ­дар­ланған стратегиялық жос­пар, жаңа өндірістік идеология. Бағдарлама бойынша бизнес-үдерістің әрбір қатысушысы орындалатын жұ­мысқа өзі­нің қарым-қатынасын ой-еле­гінен өткізуі қажет», деді ол. Бағ­дар­ламаны жүзеге асыру үшін жас мамандардың белсенді қатысуы қажеттігін атап өтіп, ҚМГ компаниялар тобы бойынша жас­тар саясатын қалыптастырып келе жатқан жастар ісі жөніндегі кеңеске үміт артатынын, сондай-ақ, ҚМГ тобының менеджментіне ең білімді және тәжірибелі жас­тарды тартуға мүмкіндік бе­ретін бірыңғай кадрлық резерв бағдарламасынан қайтарым күте­тіндіктерін жасырмады. Жалпы алғанда, жыл сайын дәстүрлі түрде өткізіліп жүр­ген «Үздік маман» байқауы еңбек­керлердің кәсіби біліктіліктерін шыңдауға көмектеседі. Кәсі­би мамандар өндірістің тиім­ділігін арттыруға ықпал етеді, өз кәсіпорындарының ұжым­дарына жаңа идеялар мен ұсы­ныстар енгізеді. Бұл орайда басқарма төрағасымен кездес­кен он жеті үздік маманның да өндіріске бергендерінен берері көп екені байқалады. Өйт­кені, байқауымызша көп­шілігі – жастар мен орта жас мөлшеріндегі түрлі мамандық иелері. Олар да өз кезектерінде басшылыққа алғыстарын білдіріп, жұмыстарына қатысты ой бөлісті. ҚМГ-ның барлық еншілес және тәуелді ұйымдарында жұмыс­шылардың жұмыс істеу уақытын, соған сәйкес еңбекақыны біріз­дендіру, дуалды оқыту мәселелері сөз болды. Кездесу соңында үздік мамандар арнайы төсбелгілермен марапатталды. Үздік мамандар сондай-ақ, бизнес-бағыттар жөніндегі басшылармен кездесіп, түрлі өндірістік, әлеуметтік мәселелер бойынша ой бөлісті. «ҚазМұнайГаз» ҰК» АҚ жас мамандарының инновациялық жобалар бойынша өткен жы­лы басталған байқауының қоры­тындысы жуырда шығарылды. ҚМГ-ның еншілес және тәуелді компанияларынан түскен 30 жобаның ішінен 3 жеңімпаз анықталды. Атап айтқанда «Қаражанбасмұнай» АҚ техник-геологы Айдын Қожаш 1-ші орынға, «Қаражанбасмұнай» АҚ ұң­ғыларды зерттеу жөніндегі аға ин­женер Руслан Ақмұханов 2-ші орынға және «Павлодар мұнай-химия зауыты» ЖШС 3-разрядты зертханашысы Әйкерім Изуева 3-ші жүлделі орынға ие болды. Сайыс жеңімпаздары білім­дерін жетілдіруге арналған сертификаттармен және ес­керткіш сыйлықтармен марапатталды. Бұл инновациялық байқау­дың мақсаты – жастардың ин­новацияға жаңаша көзқарасын қалыптастыру, олардың зият­керлік дағдысын дамыту, ғы­лымды жастар арасында насихаттау және түптеп келгенде жаңа технологияларға не­гізделген жобалар арқылы өндірісті дамыту. Жүлдегерлерді марапаттау рәсімінде «ҚазМұнайГаз» АҚ адам ресурстарын басқа­ру және еңбекақы төлеу жө­ніндегі басқарушы директоры Серік Әбденов сөз сөйлеп, жүлдегерлерді құттықтады. «Бүгін біз «ҚазМұнайГаз» ҰК» АҚ-тың жас жұмысшылары арасында жастар саясатын жүзеге асыру аясында жарияланған алғашқы инновациялық жобалар байқауының қорытындысын шығару үшін жиналып отырмыз. Байқауға түрлі сала бойынша 30 жоба ұсынылды. ҚМГ-ға тапсырылған бар­лық жобаларды біз VІІІ-ші KAZENERGY Жастар форумына жолдадық. Сіздер инновациялық жобалар бойынша байқау комиссиясы жұмыс істегенін жақсы білесіздер. Жастар форумының қорытындысында жүлделі орындар анықталды. Сондай-ақ, ҚМГ деңгейінде қатысушылардың жобаларын қарап, бағалау үшін ҚМГ басқарма төрағасының бұйрығымен жеке комиссия құрылып, жобаларға критерий бекітілді. Бұл комиссия құрамына ҚМГ өндірістік құрылымдық бөлімшелерінің жетекшілері, «ҚазМұнайГаз» өндіру және бұрғылау технологиялары ғы­лыми-зерттеу институты» ЖШС өкілдері және ҚМГ жастар кеңесінің өкілдері енгенін айта кету керек», деді ол. С.Әбденов инновациялық жобалар байқауының бұдан былай жыл сайын өткізілетінін мәлімдеді. Жастар кеңесінің күн­тізбелік жоспарына сәйкес биылғы жылы байқау өткізу 3-4 тоқсанға жоспарланған. Бүгінгі күні «ҚазМұнайГаз» ҰК» АҚ кәсіби мамандарды даярлау мақсатында «Ембімұнайгаз» АҚ базасындағы Құлсары кен орнын оқу-тәжірибелік сынақ алаңына айналдыру туралы тұжырымдама жасағаны белгілі. Соған орай инновациялық байқауда жеңіске жеткен жобалар осы кен орны­ның базасында сынақтан өткі­зілетін болады. Сонымен қа­тар, ұсынылған жұмыстар KAZENERGY қауымдастығы 2015 жылы өткізген «Innovation Man» байқауының үздік ондығына енгенін де атап өтуге тұрарлық. Шара барысында Теңіз, Қара­шығанақ, Қашаған кен орындарын өңдеу жөніндегі бас директор Евгений Огай инновациялық байқауда жүлделі орындарға ие болған жобалар жайында әң­­гі­мелеп, оларды өндіріске ен­гізу, жетілдіру, одан әрі қандай бағытта жұмыс істеу мәселесін қозғады. ҚМГ өндіріс жөніндегі департамент директорының орынбасары Ринат Измұханбет сарапшылық көзқарасын біл­дірді. Сондай-ақ, жүлделі орын­дарға ие болған жас мамандар әрқайсысы өз жобаларының ерекшеліктеріне тоқталып өтті. Жиын соңында «ҚазМұнайГаз» АҚ адам ресурстарын басқару және еңбекақы төлеу жөніндегі басқарушы директоры Серік Әбденов жүл­дегерлерді марапаттады. Жалпы, бұл екі шарадан түйгеніміз, «ҚазМұнайГаз» ҰК» АҚ алдында мынадай алмағайып заманда шынында да зор міндеттер тұр. Сол міндеттерді абыроймен жүзеге асырып, компанияның одан әрі дамуы жолында талмай қызмет атқару, жаңа мүмкіндіктер іздестіру оның әрбір мүшесінің қасиетті борышы. Сондай-ақ, мақсат-мүдденің ортақтығы әрдайым игілікті істерге бастамақ. Сонымен қатар, мұндай шаралар «ҚазМұнайГаз» ҰК» АҚ компаниялар тобының мекемелері мен еңбек ұжымдарының арасындағы кәсіби қарым-қатынастың дамуына жол ашары сөзсіз. Марат АҚҚҰЛ, «Егемен Қазақстан».
Соңғы жаңалықтар

Алматыда троллейбус өртенді

Оқиға • 24 Маусым, 2022

Ұқсас жаңалықтар