Симфониялық оркестрдің дебюті
<p style="text-align: justify;">Жуырда «Астана Балет» театрының симфониялық оркестрінің алғашқы концерті өтіп, оған Мәдениет және спорт министрі Дәурен Абаев қатысып, жаңа өнер ұжымына табыс тіледі.</p>
«Астана Балет» театрының директоры Александр Совостьянов өз сөзінде аталған өнер ордасында симфониялық оркестрдің құрылғаны – елорданың мәдени өміріндегі елеулі оқиға екендігін айта келіп: «Біз үшін бұл зор мақтаныш, үлкен жауапкершілік. Жаңа оркестрдің алға қойып отырған мақсаты көп. Алдағы таңда жетекші өнер ұйымдарының қатарына қосылып, ел мәдениетін жоғары дәрежеде таныту» деді ол.
Жаңа ұжымның алғашқы L’ouverture концерттік бағдарламасына классикалық музыканың бірегейлері таңдап алынған. Айталық, бірінші бөлімде, көрерменге Е.Брусиловскийдің «Дудар-ай» симфониялық поэмасы, К.Сен-Санстың Danse Macabre және Н.Римский-Корсаковтың «Испандық Каприччиосы» ұсынылса, екінші бөлімде – Рахманиновтың фортепиано мен оркестрге арналған шырайлы шығармалары орындалды. Сондай-ақ Қазақстанның еңбек сіңірген қайраткері, талантты солист Әмір Тебенихин тамаша туындыларымен жұртшылықтың қошеметіне бөленді.
− Біз құрамы жағынан кәсіби әрі жас ұжымбыз. Сондықтан көрермен алдында өнер көрсету мен үшін де, музыканттар үшін де зор жауапкершілік жүктейді. Шынымды айтсам, осы сәтті көптен күтіп, өнерімізді елордалықтармен бөліскіміз келді. Бүгінгі кеште көп орындала қоймайтын шығармаларды таңдап, сол арқылы өзіміздің мүмкіндігімізді көрсетуге тырыстық. Бір сөзбен айтқанда, оркестрдің өнері көрермен көңілінен шықты деп ойлаймын, − деді театрдың симфониялық оркестрінің бас дирижері Арман Оразғалиев.
Айта кетейік, мәдени кештің өтуіне Мәдениет және спорт министрлігі қолдау көрсетті.