Ана тілін ардақтаған

Дегенмен қазақ тілі жә­не әде­биет пәнінен дәріс бере­тін Ая­жан Ғаниді үздік ұстаз­дардың қатарына қосуға болады. Өйткені өзге этнос жастарына мемлекеттік тілді тереңдете оқытуға атсалысып жүр. Мұны ол өзінің перзенттік борышы санайды.

– Туған жерім – Қызылқоға ауданындағы Жасқайрат ауылы. Үлкен шаһардан шалғайда орна­ласқанымен, біздің ауыл­да ұлттық құндылықтарды ұрпа­ғы­ның санасына сіңіруді ойлаған өнегелі отбасылар тұра­ды. Басқа­ша айтқанда, кін­дік қаным тамған ауылымды қазақылықтың қаймағы бұзыл­маған ортасы дей аламын. Сол себептен болар ауылымды әркез сағынып жүремін, – дейді ол.

Оның ана тілін ардақтауға деген құлшынысы бала кезінен оянған. Мектепте оқып жүріп, аудандық, облыстық пән олипиадаларына, түрлі байқауларға қатысып, жеңімпаз атанған. Сол жетістігін жалғастыру үшін жоға­ры білім алды. Қазір Аты­рау қаласындағы №30 мектеп-гимназияда қазақ тілі мен әде­биет пәнінен сабақ береді.

– Ұстаз ретінде алға қой­ған мақсатым – өзіндік ой-пікі­рін еркін жеткізе алатын, мем­лекет­тік тілді ардақтайтын, білімді шәкірт тәрбиелеу. Шә­кірт­тің бәрі бірдей бір пәнді оқуға ынталы болмауы мүмкін. Сол себеп­тен әр оқушының пәнге деген қызы­ғушылығын ояту қажет, – дейді жас ұстаз.

Жас ұстаз дейтініміз, оның еңбек жолы басталғанына әлі бес жыл тола қойған жоқ. Соған қарамастан, педагогикалық жетіс­тіг­і аз емес. Мәселен, өткен жы­лы «Мың бала» мәдени-ағар­ту­шылық байқауының об­лыс­тық кезеңіне қатысып, бірін­ші орынды иеленді. Ол бұл байқауға «Қазақ тілі саба­ғында деңгейлеп-саралап оқыту технологиясын қол­дану» бағдар­ламасын ұсынған еді.

– «Мың бала» жобасында үздік атанған педагогтердің «Қазақ тілі сабағында деңгей­леп-саралап оқыту технологиясын қолдану» авторлық бағдар­ламасы негізінде үш нұсқаулық кітап да­йындалды. Оның бірі – авторлық бағдарламаның мазмұны, екіншісі – мұғалімге арналған нұсқаулық, ал үшіншісі – оқушының жұмыс дәптері немесе деңгейлік тапсырмалар. Бұл жобада жаңартылған бағдарлама негізінде диагнос­тикалық талдаулар жүргізіп, арнайы құрастырылған тап­сыр­малар көмегімен оқушы­лардың қазақ тілі мен әдебиеті пәнінен сауаттылық деңгейін арттыру көзделіп отыр. Мұн­дай жаңашыл тәжірибе дең­гейлеп-саралап оқы­ту технологиясын қолдану арқылы оқу­шылардың қазақ тіліне деген қызығушылығын, меңгеру тұр­ғы­сындағы белсенділігін арт­ты­­руға жол ашады, – дейді А.Ғани.

Жаңашыл ұстаз біліктілігін арт­тыру үшін түрлі байқауларға қатысып жүр. Мәселен, 2021 жылы «Bilim orkenieti» ұлт­тық инно­вациялық ғылыми-зерттеу орта­лығы өткізген рес­публикалық «Үздік жас ма­ман – 2021» бай­қауын­­да бі­рін­ші жүлдеге ие болған. Ал «Ана тілдің айбыны» деген республикалық байқауда да бағы жанып, бірінші жүлдені иелен­ді. Сондай-ақ «ХХІ ғасыр көшбас­шысы» халықаралық білім инно­ва­циялық орталығының ұйым­дастырған «Ұлағатты ұстаз» атты І халықаралық мұғалімдер сайысына да қатысты. Қашықтан өткізілген байқауда шығармашылық жаңа­шылдығы бар жас ұстаздың талпынысы «Үздік қазақ тілі мен әдебиеті пәні мұғалімі – 2021» аталымының үшінші жүлдесімен аталып өтті. Былтыр Атырау қала­лық «Үздік сынып жетекшісі» бай­қауында екінші орынға тұрақтады.

Ана тілін ардақтауды күнде­лік­ті міндетіне айналдырған жас ұстаз ұлы ойшыл Абайдың ұла­ғатты тәлімін дәрісіне жиі қол­данады. Тіпті «QAZAN.Info» сай­ты Абай Құнанбайұлының 175 жылдығына орай «Ұлы дала­ның ұлы тұлғасы – Абай» және Әбу Насыр әл-Фарабидің 1150 жыл­дығына арналған респуб­ликалық олимпиадасынан бірінші жүлдесіне ие болды. Бұл жас ұс­таз­дың шыңдала түскенін байқа­тады.

– Оқушыларымның бәрі дерлік білімді болғанын қалай­мын. Сол себептен әр дәрісім­ді «Қазақ тілі сабағында дең­гей­леп-саралап оқыту техно­ло­гиясын қолдану» бағдар­ламасымен өткіземін. Бағ­дар­­ламада оқушылардың жас ерек­шелігіне орай ойлау дәрежесін, бел­сен­ділігін арттыруға, шығар­машы­лық қабілетін дамытуға мол мүмкіндік беріліп отыр. Не­гізгі құрал – деңгейлеп-сара­лап оқы­ту­ға негізделген оқу­шыларға арналған тапсырмалар. Бұл арқылы оқушылардың әр сабақта алған теориялық білімін деңгейлік тапсырмаларды орындау арқылы тал­дауға болады, – деп түсіндірді ол.

Атырау облысы