Дәстүрге айналған жыр жәрмеңкесі

Жас жүйріктер үдеден шыға алып, үмітті ақтады деуге болады. Ғұламаның ғиб­ратты ғұмыры мен шежірелі ша­һардың тарлан тарихын кәделі жырларымен паш етіп, аяқ ­алысын байқатты.

Бұл – дәстүрге айналған жыр додасы. Облыстық мәдениет, архивтер және құжаттама бас­қармасы жан-жақты қол­дау білдіріп, облыстық мәде­ни-са­уық және халық шығарма­­шы­лы­ғының ғылыми-әдістеме­лік орта­лығы мен «Арқа» айтыс ақын­дары мен жыршы-тер­­ме­шілер мектебі бірлесе ұйым­дастырды.

Айтыстың ресми салтанатын ашып берген облыс әкімі­нің орынбасары Ерлан Құсайын көпшілікті Ұлыс күні­мен құт­тықтады.

– Кезіндегі кеңес заманын­да біраз дүниемізден қол үздік. Уағында еркімізді алса да, ең­семіз түскен жоқ. Еншіміз­ді алса да, Егемендігімізді жо­ғалт­қан жоқпыз. Өшкеніміз қай­та жанып, өлгеніміз қай­та тірілді. Сондай асыл қазы­на­мыз­дың бірі – осы айтыс өнері. Құндылықтарымыз­бен қай­та қауыштық. Өзбек­әлі Жәнібековтей арыс аза­ма­тымыздың қайраткер­лігі­нің арқасында Наурыз өз дең­гейінде тойлана бастады. Енді Мемлекет басшы­сы Қасым-Жомарт Тоқаев бұған терең мағына үстеді. Биыл әз Наурыз жаңаша мәнге ие болды. Алыстың жақындайтын, араздың татуласатын ерек күн­дері бұл. Жалпыхалықтық сипатқа ие болып жатқан тағы­лымы терең, дәстүрі дестелі Ұлт мерекесі баянды болсын! Ақындар алқынбасын! – деді Ерлан Бейсенбайұлы.

Жыр жәрмеңкесіне сонау Түркиядан руханияттың үл­кен жүректі жанашыры, Қазақ­стан өнеріне еңбек сіңір­ген қай­раткер, Қарағанды облы­сы­ның Құрметті азаматы, профессор Дүйсен Қасейінов келіп, жас дүлдүлдердің өнерін тамашалап, оң бағалады.

Айтысқа ендігі елге кеңінен танылып үлгерген Арқаның әр тарабынан келген айтыскерлер қатысты. Нұрмұхаммед Байсүгіров, Мұхтар Әділов, Дос­кей Ботбай, Еркеғали Бекбо­лат, Нұрсұлтан Ырымбай, Думан Саматұлы, Төрехан Сәбет, Нұрлыбек Төкен, Ерға­ли Әлихан, Жанарыс Тілеу­бек, Бекарыс Оспанов, Қай­рат Рысмағанбет, Сырым Нығыз­бай, Жандос Бақытұлы сахнаға жеребе арқылы шығып, сөз сайыс­тырды.

Ал жас өрендердің өне­ріне ақын, филология ғылым­да­рының докторы, профессор Қойлыбай Асан, қазақ ән өне­рінің Әміресі атанған, «Құрмет» орденінің иегері Сер­жан Мұса­йын, ғалым-ұстаз Саржан Такиров, көрнекті публицист, облыстық «Оrtalyq Qazaqstan» газетінің бас редакторы Ерсін Мұсабек, ақтангер ақын, жыршы-жырау Дидар Қамиев баға берді.

Жас дүлдүлдердің дүбірі ұзаққа созылды. Олар ел ішін­­дегі келеңсіз дүниелерді тамыр­­шыдай тап басып айтты. Тай­салмады да, тосыл­мады да. Сөзден де іркілмеді. Әлем­ге аты тараған ғалым Қа­ныш есі­мін лайықты ұлық­тай алды.

Таланттардың тағылымды тіркестеріне көрермен көркем көңіл күймен қошемет соғып, қиқу қосып отырды. Мұны се­зінген жас шайырлар аузымен құс тістеп, от бүркіді.

– «Айтыс – сөз барымтасы» деп заңғар Мұхтар Әуезов айтып кеткендей, сөз сайысында аталған шайырлар­дың бәрі де тыңнан тіркес, өрнек­ті сөз тастады дей аламыз ор­таға. Ақындар елдік өзекті дү­ниелерді өзінше тәпсірледі деген сенімдемін, – дейді айтыс тізгіншісі, әдебиетші ғалым, «Арқа» ақындар мен жыршы-жыраулар мектебінің басшысы Айтбай Жұмағұл.

Ақтық сынға қатарлас­тары­нан оқ бойы озық кө­рінген төрт ақын топ жарып шықты. Үшінші орынды Жандос Бақытұлы мен Нұрсұлтан Ырымбай, екінші орынды Сырым Бейсембек пен Нұрмұхамбет Байсүгіров қанжығалап, бірінші орын тұ­ғырынан Думан Сымбат көрінді. Ал айтыстың қос айна­лымында да шашасына шаң жұқтырмаған жас дарын Еркеғали Бекболат жүлде қоры 500 мың теңгені құраған бас бәйгені еншіледі.

Қарағанды облысы