«Тарбағатай» паркіне шетел ғалымдары аяқ басты
<p style="text-align: justify;">Ауыл шаруашылығы министрлігі Орман шаруашы­лығы және жануарлар дүниесі комитетіне қарасты 2018 жылы құрылған «Тарбағатай» мемлекеттік ұлттық табиғи паркі – биологиялық және ландшафтық әртүрлілікті сақтау, табиғатты қорғау мен экологиялық-ағарту жұмыстарын жүзеге асыратын мекемелердің бірі.</p>
2018 жылы құрылған, аумағы 145 мың гектарды құрайтын ұлттық паркте 1 640 түрлі өсімдік өседі. Олардың ішінде 169 эндемиялық түрі болса, 35 түрі Қазақстанның «Қызыл кітабына» енген.
Таяуда Астана халықаралық университетінің бастамасымен «Тарбағатай» мемлекеттік ұлттық табиғи паркінде докторанттардың диссертациялық жұмыс тақырыптары мен ғылыми жобалары негізінде далалық ғылыми зерттеу жұмыстары жүргізіліп, басқосуға Қазақстанның биолог ғалымдарымен қатар Польша, Израиль, Жапония елдерінің ғалымдары келді.
Шетелдерде ғылыми тағылымдамадан өтіп, ғалымдармен тығыз байланыс орнатқан зерттеушілер жаңа тыныс тапқан. Ал аталған паркке келген Польша, Израиль, Жапония елдерінің ғалымдары ұлттық парк аумағындағы өсімдіктердің өсу жиілігі мен флорасын зерттеуде үлкен жаңалықтарға кенелеріне зор сенім білдірген екен.
«Тарбағатай» мемлекеттік ұлттық табиғи паркі мен Астана халықаралық университеті арасындағы меморандум шеңберінде орындалып жатқан аталған зерттеу нәтижесі алдағы уақытта әлемдік деңгейдегі өсімдіктер мен жануарлар әлемінен хабар беретін журналдарда, ғылыми еңбектерде жарияға шықпақ.
Қазақстанның «Қызыл кітабына» енген ерекше тіршіліктің жойылып кету қаупімен күресуге бағытталған экспедициялар – Тарбағатай тауындағы өзге де тіршілік иелеріне әлем ғалымдарының назарын бұру мақсатын көздейді.
Бұл туралы толығырақ «Egemen Qazaqstan» газетінің бүгінгі санына шыққан Қуат Қиықбайдың «Өзгеше өсімдіктер әлемі» мақаласынан оқи аласыз.