Сазгер сыры
<p style="text-align: justify;">Ұлттық академиялық кітапханада әнші-сазгер, Қазақстанның еңбек сіңірген қайраткері Елена Әбдіхалықованың «Менің жалғыз жұлдызым» және түрік тілінде жарық көрген «Қош дерсің» атты жыр жинақтарының, сондай-ақ «Сағыныш-ғұмыр» атты партитуралар жинағының таныстырылымы өтті.</p>
Ақынның қос жыр жинағына әр жылдарда жазған өлеңдері мен әндерінің мәтіндері топтастырылған. Ал «Сағыныш-ғұмыр» атты партитуралар жинағына сазгердің көпшілікке танымал туындыларының оркестрге арналған партитуралары мен ноталары беріліп отыр. Кітап жалпы өнерсүйер қауымға, сондай-ақ кәсіби музыкалық оқу орындарына, ұжымдарға арналған. Таныстырылымға мемлекет және қоғам қайраткерлері мен зиялы қауым өкілдері қатысты.
Жиынға Жазушылар одағы Астана қаласындағы филиалының директоры Бауыржан Бабажанұлы модераторлық етті. Президент кеңесшісі, академик Бауыржан Омарұлы кеш иесіне Мемлекет басшысы Қасым-Жомарт Тоқаевтың Алғыс хатын табыс етті. Үш бірдей кітаптың лентасы қиылған жиынға мемлекет және қоғам қайраткері Күләш Шәмшидинова, жазушы Әлібек Асқаров, ақындар Маралтай Райымбекұлы, Әбубәкір Смайыл, Маржан Ершу, режиссер Гүлсина Мерғалиева, басқа да зиялы қауым өкілдері қатысып, Елена Мәжитқызының айтыскерлік, сазгерлік, ақындық қыры жайында лебіздер мен естеліктер айтылды.
Белгілі музыкатанушы Жанғали Жүзбай Елена Әбдіхалықованың саз өнеріндегі ерекше жолы, оның әр жылдары жазған көпшілікке танымал туындыларының оркестрге арналған партитуралары мен ноталары беріліп отырған «Сағыныш-ғұмыр» атты жинағы жайында кеңірек айтып өтті.
Айта кетейік, бұл таныстырылым өнер иесінің жуырда елордада өткен «Сағыныш ғұмыр» атты мерейтойлық кешінің аясында ұйымдастырылды.