86 жастағы журналист
<p style="text-align: justify;">Ұлытау облысының абыз ақсақалы, ақын, «Құрмет» ор­денінің иегері, Қазақстанның құр­метті журналисі, Ұлытау ауда­нының құр­метті азаматы, Журналистер ода­ғының мүшесі, бір­неше кітаптың авторы Мағзұмбек Машайықұлының жур­на­лис­ти­кадағы еңбегі ерен.</p>
Мағзұмбек Машайықұлы әлі тұғырдан тайған жоқ. Жасы 86-ға келсе де, қолынан қаламын тастамай еңбек етіп жүр. Оның журналистика саласында қызмет істеп келе жатқанына 62 жыл.
«Әлі күнге дейін жұмыс істеп жүрмін. Үкімет қызметімді елеген шығар, «жұмыс істей беріңіз» деп рұқсат берді. Өмірімнің басым бөлігін өткізген газет менің тәрбиешім болды. Халықтың арасында елдің тыныс-тіршілігін біліп, өзің де сабақ алып, содан есейеді екенсің. Журналист – өте құрметті мамандық. 40 жыл «Ұлытау өңірі» газетінде редактор, 14 жыл редактордың орынбасары болдым. Қазір кеңесші болып жұмыс істеймін әрі мақала жазып тұрамын. Газеттегі қызмет менің атағымды шығаруға ықпал етті, көптеген ақын-жазушы – Мұхамеджан Қаратаев, Сырбай Мәуленов, Ғафу Қайырбеков, Қадыр Мырзаәлі, Зейтін Ақышев, Ақселеу Сейдімбеков сияқты қаламгерлермен бірге жүрдім, дос, сырлас болдым. Мені Алматыға алып кетеміз дегендерден бас тарттым. Оларға өзімнің туған жерімде, өзімнің өсіп-өнген ортамда, қасиетті Ұлытауымның бауырында еңбек ете беремін дедім. Еліміздің бас басылымы «Egemen Qazaqstan» – мықты газет. Әлі күнге дейін мақала жіберіп тұрамын. «Социалистік Қазақстан» газеті болып тұрғанда да, мақала жазып тұрдым. Ел газеті көптеген азаматты тәрбиелеп шығарды. Халықтың мұң-мұқтажын жоқтады. Сондықтан барлық қаламгерге шығармашылық табыс тілеймін», деп ақ батасын берді абыз ақсақал.
Бұқаралық ақпарат құралдары қызметкерлерінің күні қарсаңында Жезқазған қаласында Ұлытау облысы әкімі Дастан Рыспеков «Ūlar» сыйлығын табыстап, сол қатарда Ұлытау облысы журналистикасын дамытуға қосқан үлесі үшін 1 млн теңге ақшалай сыйақымен Мағзұмбек Машайықұлын марапаттады.
Ұлытау облысы