Зерделі ұлттың бүгіні мен ертеңі
<p style="text-align: left;">Мемлекет басшысының «Кітап оқу мәдениетін дамыту және зерделі ұлт қалыптастыру жөніндегі шаралар туралы» Жарлығы шыққаннан бері кітап оқудың маңыздылығына кітапханашылар ғана емес, жергілікті билік өкілдері, оқу орындары, ғалымдар мен қаламгерлер де күрт бұрылды. Соның бірі жақында Петропавлдағы С.Мұқанов атындағы облыстық әмбебап-ғылыми кітапханада «Зерделі ұлт – Қазақстанның болашағы» атты ғылыми-тәжірибелік конференция түрінде аталып өтті.</p>
Конференция еліміздегі кітап оқу мәдениетін дамыту мәселелерін талқылау мақсатында кітапхананың белсенді оқырмандар қауымдастығының, білім беру ұйымдарының, жазушылар мен журналистердің басын қосты. Іс-шараны облыстық мәдениет басқармасы басшысының орынбасары Мафруза Науанова ашып, Президенттің зиялы, зерделі ұлтты тәрбиелеу барысында кітап оқудың маңыздылығына назар аударғаны өзекті мәселе екенін айтты: «Халықтың смартфоннан алатын сенімсіз ақпараттарға байланып қалғаны жақсылыққа апармайды. Абай айтқандай, «Артық білім – кітапта», біз осы жолды ұстанып, жастарды үнемі кітап оқуға жұмылдыруымыз керек», деді ол өзінің сөзінде.
Алғашқы сөз кезегін алған М.Қозыбаев атындағы Солтүстік Қазақстан университетінің профессоры Зарқын Тайшыбай «Алаш көсемдерінің шығармашылық өнегесі» деген тақырыпта баяндама жасады:
«Алаш көсемдерінің ХХ ғасырдың басында халықты жаппай оқуға жұмылдыруға тырысқан өнегесі бүгін де өзекті болып отыр. Алаш көсемдері оқулықтың сапалы болуы, балаларға қызықты болуы көркем әдебиетке деген құштарлығын оятатынына назар аударды», деді ол.
«Кітап – адамның өмірлік серігі» деген тақырыпта қызықты баяндама жасаған Халықаралық «Алаш» әдеби сыйлығының лауреаты Жарасбай Сүлейменов бүгінгі таңдағы халықтың кітап оқуға самарқау қарайтындығының себебін ашуға тырысты. Журналист атап өткендей, кітапқа деген қызығушылықты арзан хабарлар, күлкі үшін жасалатын роликтер жаулап алмауы керек.
Конференцияға Алматыдағы Абай атындағы Қазақ ұлттық педагогикалық университетінің профессоры, философия ғылымдарының докторы Дәуренбек Құсайынов та қатысып, ұсынылған мәселелер бойынша өз ойын ортаға салды. Сонымен қатар Петропавл қаласы білім бөлімінің басшысы Динара Рақышева, Жазушылар одағының орыс әдебиеті секциясының жетекшісі Кирилл Филонов, жазушы Сағындық Рахымжан, облыстық «Солтүстік Қазақстан» газетінің бас редакторы Ербақыт Амантайұлы, ақын Диас Аяған, Ұлттық ұлан академиясының тілдік даярлық кафедрасының басшысы, майор Раушан Әлжановалар да мінберде маңызды мәселе көтерді. Әлемде дамығын елдер кітап оқуға көп көңіл бөлетіндігі жеткізілді. Мысалы, Ербақыт Амантайұлы АҚШ тұрғындары жылына – 17, Үндістан тұрғындары – 16, Англия, Франция, Италия мемлекеттері 14-15 кітаптан оқитындығын айтты. Ал қазақстандықтар жылына 3 кітаптан артық оқымайды екен. «Кітап оқу бойынша біз әлемде 91-орын аламыз», деді ол өз сөзінде.
Сөйтіп, кітап оқу мәдениетін арттыру, сол арқылы зерделі ұлт қалыптастыру мәселесіне арналған үлкен жиын аяқталды. Оның қорытындысы оқу орындарына жіберілетін болды. Ал Президенттің Жарлығына сәйкес шаралар жоспары жасалып, оларды биыл ғана емес, жыл сайын өткізу туралы қарарда атап өтілді. Жиынға белсенді оқырмандармен қатар облыс аудандарының және қаланың кітапханашылары, журналистер, ғалымдар қатысты.
Солтүстік Қазақстан облысы