Қазақстанда және әлемде электромобиль қанша тұрады?
<p data-start="883" data-end="1227"><strong>2026 жылғы 1 қаңтардан бастап елге электромобиль импорттау бойынша бұрынғы жеңілдіктер тоқтатылды. Енді импорттаушылар кедендік құнының 15%-ы мөлшерінде кедендік бажды, сондай-ақ 16% қосылған құн салығын (ҚҚС) және өзге де салықтарды толық көлемде төлейді. Импорттаушылардың бағалауынша, осы өзгерістердің нәтижесінде жаңа электромобильдердің бағасы орта есеппен 33-35%-ға қымбаттаған, деп хабарлайды <a href="/" target="_blank" rel="noopener noreferrer">Egemen.kz.</a></strong></p>
2026 жылғы 1 маусымдағы жағдай бойынша Қазақстанда 24 634 жеңіл электромобиль тіркелген. Елдегі барлық тіркелген электромобильдердің 62%-ы – Алматы қаласына тиесілі.
Қазақстандағы жаңа электромобильлердің бағасы:
- Geely Galaxy EX2 – 8,5 млн теңгеден бастап;
- Geely Galaxy CityRay – 8,29 млн теңгеден бастап;
- Geely Galaxy Preface – 9,59 млн теңгеден бастап;
- Geely Galaxy EX5 (электрлі нұсқасы) – 11,99–12,99 млн теңге;
- BYD Song Plus DM-i (гибрид) – 16,7 млн теңгеден бастап;
- BMW iX3 – 50,3 млн теңгеден бастап.
Сонымен қатар Geely Galaxy компаниясы 2026 жылы Қазақстан нарығындағы өз позициясын нығайту мақсатында модельдер желісінің бағасын төмендетті.
Салыстыру үшін айта кетсек, 2026 жылғы қаңтарда әлем бойынша жаңа электромобильдің орташа бағасы шамамен 55 715 долларды құрады.
Әртүрлі елдердегі орташа бағалар:
- Қытайда – шамамен 21 360 еуро;
- Норвегияда – 53 400 еуро;
- АҚШ-та – шамамен 50 730 еуро.
Электромобильдердің сатып алу бағасы өскенімен, оларды пайдалану Қазақстанда бензинмен жүретін көліктермен салыстырғанда әлдеқайда тиімді болып қала береді.
Мысалы, 10 мың шақырым жол жүруге жұмсалатын электр энергиясының шығыны шамамен 60 мың теңгені құрайды. Ал дәл осындай қашықтыққа бензинмен жүретін автокөлікке шамамен 300 мың теңге жұмсалады.
Бұдан бөлек, Қазақстанда электромобиль иелері – жыл сайынғы көлік салығын төлемейді және ірі қалаларда тегін автотұрақтарды пайдалану құқығына ие.
Еске сала кетейік, бұған дейін Қазақстанға 2025 жылы BYD Destroyer 05 көліктерін әкелген азаматтар мемлекеттік кірістер органдарының әрекетіне наразылық білдірген еді.