Солдатсайдағы сайыпқырандар

Шаңғы

Қазақстан командасының қоржынына алғашқы алтын медальдарды салды Қазақстандық спортшылар да өз сайыпқырандығын Солдатсайда таныта білді. Мұнда Қысқы Азия ойындары медальдарының алғаш­қы жиынтығы шаңғыдағы спорт­тық бағдарлау бойынша бәс­ке са­лынған еді. Осынау сприн­терлік жа­рыста қайсарлық танытып, же­ңіп шыққан Ольга Новикова ел қор­жынына түскен алғашқы ал­тын­ның иегері атанды. Ол қашық­тықты 13 минөт 4,7 секөнтте жү­ріп өтті. Одан 4 минөт 25,1 се­көнт­ке қа­лып қойған қытайлық Лю Сяотин екінші орынға шықты. Қазақ­станның тағы бір өкілі Евгения Кузьмина жүлдегерлер үштігін түйіндеді. Ол 18 минөт 46,8 секөнт уақыт көрсетті. Уақыт айыр­машы­лығынан-ақ жеңімпаздың айқын ба­сымдығы танылып тұрғандай. Олай болса, осы Азиадада спорт­тық бағдарлау жөніндегі ел құра­масының көшбасшысы Ольга Новикова өзінің әлемнің мықты бағ­дарлаушыларының үштігіне кіретінін тағы бір айғақтады. Ал енді ерлер арасындағы шаң­ғы­мен бағдарлаудағы спринтерлік бі­ріншілікте барын салған Михаил Сорокин Қазақстанға Азия ойын­дары­ның екінші алтын медалін әкелді. Қашықтықты жүріп өтуге ол 13 минөт 31 секөнт уақыт жұм­сады. Сорокиннен 1 минөт 42,7 секөнт ұтылған командалас жолда­сы Александр Бабенко күмісті ол­жалады. Ал қола медальді Моңғо­лия өкілі Герелт-Од Байараа еншіледі. Шығысқазақстандық Алексей Пол­торанин шаңғы мен спринтерлік жүгірудегі 1,6 шақырымдық же­ке біріншілікте жеңімпаз ата­нып, команда қоржынындағы ал­тын ал­қа­ларды молайта түсті. Фи­налдық бәсекеде ол мейлінше шиеленіскен тайталас-тартыс бары­сын­да өзінің командалас жолдасы ақмолалық Николай Чеботькодан мәреден сы­нық сүйем дерліктей ғана бұрын өтті. Олар қашық­тық­тың соңғы сантиметрлеріне дейін аянбай кү­рес­ті. Қорытындысында Полторанин 3 минөт 59,9 секөнт уақытпен тұғырдың ең биігіне көтерілсе, Чеботько одан небәрі 0,1 секөнт ғана қалып қойды. Қа­лай десек те, алтын да, күміс те біздікі болды. Дей тұрсақ та, Онданың өкі­нішінің орнын спринтерлік жеке біріншілікте өз еліне Азиаданың алғашқы алтын медалін сыйлаған жапондық шаңғышы қыз Мадока Нацуми толтырды. Ақтық жүгі­руде Мадока жарыс жолының орта тұсында бәсекелестерінен бірнеше метр сытылып шығып, содан мә­реге жеткенше өзіне ешкімді ма­ңайлатпады. Жеңімпаздың нәти­же­сі 3 минөт 35,2 секөнт болды. Биатлонның 7,5 шақырымдық спринтерлік біріншілігінде қазақ­стандық қыздардың алтын олжа­лайтын реті де, мүмкіндігі де бар-ақ еді. Бірақ бұл жолы қытайлық Ван Чуньлидің жолы болғаны анық. Ол екі атыс шебінде бірде-бір рет мүлт жібермей мергендік та­ны­тып, ақы­рын­да қашықтықты 23 минөт 12,1 секөнт уақытпен аяқ­тап, алтынды аузымыздан жырып әкетті. Атыс шебінде біздің Ванкувер Олимпиа­дасындағы күміс жүлдегеріміз Елена Хрусталева да құралайды көзге атқан мергендігін көрсеткенімен, жылдамдығын үдете алмай, екінші орында қал­ды. Біз болсақ, бірта­лайға дейін Елена алтынды алған-ақ шығар деп ойлағанбыз. Екінші атыс шебінде бір рет жаңылған тағы бір өкіліміз Марина Лебедева жүйрік­тігінің арқасында үшінші орынды еншіледі. Сөйтіп, жеңістің екінші және үшінші тұғырына өз отан­дастарымыз көтерілді. Қалай десек те, алтын мен кү­міс олжалаудан Солдатсайдағы қар­қы­ны­мыз жаман басталмаған сияқ­ты. Қорғанбек АМАНЖОЛ.