Білімді баланың бағы жанды

Он бір жыл білім алған оқу­шының білімінің сараланар сәті келді. Бұдан үш жыл бұрын ҰБТ-дан Атыраудағы ағылшын тілін тереңдетіп оқытатын техникалық гимназияның үш оқушысы 125 балл алған еді. Алайда, биыл Атырау мектептерін бітірген 4633 оқушының бірде бірі дәл осындай ең жоғары көрсеткішке қол жеткізбеді. Олардың арасынан 3110 оқушы ғана ҰБТ тапсыруға ниет етіпті. Бұлардың басым бөлігі сынақты қазақша тапсырған. Қазір мектеп бітірушілердің бәрі де ҰБТ-дан қанша балл алғанын біледі. Атыраулық түлектер арасынан тек Ж.Досмұхамбетов атындағы лицейдің бітірушісі Жадыра Қаттар ғана 123 балл жинады. Ол ҰБТ сұрақтарына берген жауабының екеуінен қателесіпті. Облыс әкімінің орынбасары Әлібек Нәутиевтің мәлім етуінше, мектеп бітірушілердің ҰБТ-дағы орташа көрсеткіші 70 пайызды құрап отыр. Оқу жылының аяғында 76 түлек «Алтын белгі» алуға үміткер болған екен. Алайда, бәрі­нің бірдей үміті ақталмады. Бап та, бақ та сыналған сәтте 39 түлек қана өздерінің білімімен үздіктердің үздігіне ғана берілетін «Алтын белгіге» лайықты екенін дәлелдей алды. Ал «Үздік аттестатты» тек 6 түлек алатыны белгілі болды. Бастапқыда атауымен ерекшеленіп тұратын бұл аттестатты иеленуге 18 түлектің мүмкіндігі болғанымен, сынақ қорытындысында олардың тек үштен бірінің ғана жолы оңғарылды. – Мектеп бітірушілердің 1 117-сі, яғни, ҰБТ тапсырушылардың 35,9 пайызы 50 балл жинай алма­ды. Ең жоғары көрсеткіш –123 балл, ең төменгісі – 22 балл, – деп мә­лім етті облыс әкімінің орынбасары Әлібек Нәутиев. Индер және Мақат аудан­дары­ның бірде-бір түлегі «Алтын бел­гіге» ие болған жоқ. Бірақ, өткен жылғыға қарағанда, ҰБТ тап­сыру кезінде заң бұзушылық байқалмапты. Мұның себебін об­лыстық білім басқармасы бас­шы­сының орынбасары Зыли­ха Дүй­секенова төмендегіше түсін­діріп берді: – Оқушылардың ҰБТ-ға психо­логиялық бейімделуін қа­лып­тастыру, сонымен бірге, оларға тест тапсыру технологиясын түсіндіру мақсатында оқу жылының басынан бірнеше рет сынама тестілеу жүргізілген. Ата-аналар мен оқу­шыларға тестілеу ережесі толық түсіндіріліп, аудиторияларға тыйым салынған құралдармен кіру­дің ережеге сай еместігі ескер­тілді. Осының нәтижесінде мек­теп бітіруші оқушылар заң бұзушы­лыққа соқтыратын өрескел әрекет­терге бармады. Олардың тарапынан заң бұзушылық болмағаннан кейін бірде бірі аудиториядан шығарылған жоқ. Оқушылар тек өздерінің біліміне ғана сенді. Оның пікірінше, былтырғыға қарағанда, «Алтын белгі» иегерлері 14-ке артып отыр. 100 балдан жо­ғары алғандар қатары 128-ге кө­бейіпті. Бірақ, «Үздік аттестат» алу­шылар 2 оқушыға кемігені бай­қалыпты. Қалай дегенде де, тек білімді оқушының ғана бағы жанып, ұстаздарының да, ата-ана­сының сенімін ақтады. Жолдасбек ШӨПЕҒҰЛ, «Егемен Қазақстан» АТЫРАУ