Қазақстан Республикасының Төтенше және өкілетті елшісі Қайрат Саржанов Бразилия Федеративтік Республикасы президентінің міндетін атқарушы Мишель Темерге Сенім грамотасын тапсырды.
Кездесу барысында сұхбаттастар екіжақты қарым-қатынастарды дамытудың перспективаларын талқылады. Қ.Саржанов еліміздің Бразилиямен машина жасау, металл өңдеу, мұнай және мұнай химиясы өнеркәсібі салаларында ынтымақтастықты нығайтуға, сондай-ақ, бразилиялық инвестициялар мен жаңа технологияларды тартуға мүдделі екенін жеткізді.
Елші екіжақты сауда айналымының құрылымын ескере отырып, ауыл шаруашылығы саласында ынтымақтастықты дамыту мүмкіндігі мол екенін атап өтті, оның ішінде Қазақстан аумағында ет, сүт шығаратын бірлескен кәсіпорындар құру, сондай-ақ, ауыл шаруашылығы өнімдерін заманауи технологияларды қолдану арқылы өңдеу бойынша тәжірибе алмасу сияқты мәселелерге назар аударылды. Сонымен бірге, ол еліміздің әуе байланысы құрамында Бразилияның «Ембраер» компаниясының 12 жолаушы ұшағының бар екеніне байланысты Қазақстанда авиациялық-техникалық орталық ашу мүмкіндігін қарастыруды ұсынды.
Елші Астанада ЭКСПО-2017 халықаралық мамандандырылған көрмесін өткізуге дайындық жұмыстары белсенді жүргізіліп жатқанына ерекше назар аударып, Бразилияның қатысуы туралы ресми растау құжатын жіберу мәселесін және «ЭКСПО» Комиссарын тағайындау рәсімін тездетуге шақырды. Бразилияның «Итайпу Бинасионал» компаниясы ЭКСПО-2017 алаңында ұлттық павильон ашу мәселесінде Бразилия үкіметіне қаржылық көмек көрсетуге дайын отыр екен.
Қ.Саржанов Қазақстанда «Нұрлы Жол» бағдарламасы мен Бес институттық реформаны жүзеге асыруға бағытталған «100 нақты қадам» Ұлт Жоспары негізінде қоғамды дамыту мен экономиканы әртараптандыру бойынша атқарылып жатқан жұмыстар, инвестициялық климатты жетілдіру бағытындағы іс-шаралар, жекешелендіру үдерістері туралы хабарлады. Сондай-ақ, елші Қазақстан Президентінің бітімгерлік бастамасы – «Әлем. XXI ғасыр» манифесінің негізгі қырлары туралы баяндады.
Өз кезегінде М.Темер Қазақстан Президенті Нұрсұлтан Назарбаевқа Қазақстан халқының игілігі үшін жасап келе жатқан жұмысында табыс тіледі. Дүниежүзінің саясат сахнасында Қазақстанның беделі өсе түсіп отырғанын атап өтіп, Бразилияның елімізбен барлық салада өзара ықпалдасуға дайын екендігін білдірді және екі жақтың сауда-экономикалық әлеуетін белсенді ете түсуге барлық мүмкіншіліктер бар екенін мәлімдеді.
«Егемен-ақпарат»