Рио-де-Жанейрода өтіп жатқан Олимпиялық ойындардың бокс турнирінде бірінші 1/16 финалдық шайқасын британиялық Энтони Фоулермен өткізіп, 3:0 есебімен жеңіске жеткен 75 кг салмақтағы жерлесіміз Жәнібек Әлімханұлының келесі айналымдағы қарсыласы анықталды.
Жәнібек 1/8 финалда осының алдында конголық Мип Нгамиссенгуені 3:0 етіп тізе бүктірген алжирлік Ильяс Аббадимен қолғап түйістіретін болды. Ал бұл жұптан жеңіп шыққан боксшы 1/4 финалда ресейлік Артем Чеботарев пен әзербайжан Камран Шахсуварлы жекпе-жегінің жеңімпазымен жұдырықтасады.
Айта кетейік, әзербайжан боксшысы бұдан бірнеше жыл бұрын Ақтөбеде тұрып, үш рет Қазақстан чемпионатына қатысқан. Ол екі рет біздің еліміздің қола жүлдегері атанған.
Дастан КЕНЖАЛИН
Фото: facebook