Жақында Алматы қаласының тұрғыны Молдияр Серікбаев ағамызға хат келді. Хат келгенде аннан-мұнан емес, кешегі Кеңес Одағының астанасы, бас қаласы болған Мәскеуден. Хатты Мәскеу қаласының мәдениет департаменті жолдапты. Онда қазағымыздың мерейін өсіретін, жанына жағымды жаңалық сүйіншілеген ақжолтай хабар бар.
Сөйтсек, бұрын геолог болған, кейін мәдениеттанушылықпен бел шеше айналысып жүрген, «Егеменнің» Алматы бөлімшесіне әркез еркіндеп кіретін ардагер ақсақалымыз Мәскеудің билік орындарына халқымыздың біртуар ұлы, Шерхан Мұртазаша айтсақ, қызыл жебесі Тұрар Рысқұловтың есімін есте қалдыру туралы бірнеше мәрте мәселе көтеріп, хат жазған екен. «Тамшы тас жарады» демекші, осы мәселе бойынша отандық тарих пен мәдениеттің аса көрнекті оқиғалары мен қайраткерлерін есте қалдыру жөніндегі комиссия өткен жылдың 2 желтоқсанында оң шешім қабылдапты. Атап айтқанда, Ресей Федерациясындағы Қазақстан елшілігінің өтінішіне орай Покров бульвары, 14-үй мекен-жайы бойынша өзі Мәскеуде тұрған үйде мемлекет қайраткері Тұрар Рысқұловқа арналған ескерткіш тақта орнатылатын болды.
Қорғанбек АМАНЖОЛ.