16-17 тамыз күндері Өскемен қаласында Қазақстан Республикасы мен Ресей Федерациясы ішкі істер министрліктерінің екінші бірлескен алқа отырысы өтті. Оның жұмысына екі мемлекеттің ішкі істер министрлері Қалмұханбет Қасымов пен Владимир Колокольцев, олардың орынбасарлары, қызметтер мен шекаралас ішкі істер органдарының басшылары, сонымен бірге, Шығыс Қазақстан облысы әкімдігінің өкілдері қатысты.
Делегация басшылары екіжақты ведомствоаралық қатынастардың даму барысына жоғары баға беріп, алғашқы бірлескен алқа мәжілісінің шешімдерін (Астрахань қ., 2015 жыл) іске асырудағы қадамдар, әсіресе, шекаралас аймақтарда қылмысты алдын ала тергеуді жүзеге асырудағы ынтымақтастық жанданғанын айтты. Ал Қ.Қасымов қылмысқа қарсы күрес мәселесіндегі министрліктердің өзара іс-әрекеті жаңа сапалы деңгейге көтерілгенін атап көрсетті.
Отырыс барысында екі мемлекеттің экстремизмге қарсы күресте бірлесе әрекет ету мәселелері талқыланды. Террористік және экстремистік қылмысқа қатысы бар іздеуде жүрген адамдар, террористік және экстремистік ұйымдар туралы ақпарат алмасуды жандандыру жолдары қарастырылды. Сондай-ақ, кездесуде жол қозғалысын қамтамасыз ету саласындағы ішкі істер органдарының екіжақты ынтымақтастығының жай-күйі мен болашағы сөз болып, оны жетілдіру шаралары пысықталды.
Бұдан бөлек, тараптар автокөлік құралдарын тіркеу және есептен шығару, тіркеу және жүргізуші куәліктерін беру, сонымен қатар, көлік құралдары мен оны ұрлауға қатысы бар адамдарды табу үшін жедел іздестіру шараларын жүргізу жөнінде өзара іс-қимыл жасау туралы жедел мәлімет алмасуды жандандырудың жолдары хақында пікір алмасты.
Отырыс қорытындысы бойынша делегация басшылары экстремизммен күрес және жол қауіпсіздігін қамтамасыз ету саласындағы ынтымақтастықты өрістетуге бағытталған шешімге қол қойып, бірлескен алқа отырысының алдағы жылға арналған жұмыс жоспарын бекітті.
«Егемен-ақпарат»