Оңтүстік-Шығыс Азияға жасаған жұмыс сапары барысында ЭКСПО-2017 халықаралық мамандандырылған көрме комиссары Рәпіл Жошыбаев Сингапурде аралдық мемлекеттің ЭКСПО-2017 көрмесіне қатысуына жауапты Ұлттық секцияның комиссары – Сауда және индустрия министрлігі департаментінің директоры Вонг Тун Джунмен және Сингапур туристік агенттігі ұлттық ассоциациясының президенті Дэвиндер Оримен кездесті.
Кездесу барысында Рәпіл Жошыбаев пен Вонг Тун Джун екі ел арасындағы сауда-инвестициялық және ғылыми ынтымақтастық мәселелерін талқылады. Оның ішінде «жасыл» технология саласындағы жетістіктер жан-жақты тілге тиек етіліп, Сингапур компанияларының Астанадағы көрмеге қатысу мүмкіндігі талқыланды. Сингапур комиссары бұл елде «жасыл» энергетиканы дамытуға айрықша мән берілетіндігін айта келіп, саланы дамытуға мемлекет бюджетінен 3,4 миллиард АҚШ доллары көлемінде қаржы бөлінгендігін атап көрсетті. Бүгінде жаңғырмалы энергия көздері арқылы алынатын энергетика саласында 18 мың адам жұмыспен қамтылған. Ол сонымен бірге, Астанада өткізілетін ЭКСПО көрмесінің бұл маңызды салаға жаңа технологиялар тартуға, ғылыми базаны нығайтуға және Қазақстанның халықаралық дәрежедегі беделінің артуына ықпал ететіндігін айтты.
Кездесу қорытындысында Р.Жошыбаев пен Вонг Тун Джун ЭКСПО-2017 халықаралық мамандандырылған көрмесіне сингапурлік тараптың қатысатындығы жөніндегі шартқа қол қойды.
Сингапур туристік агенттігі ұлттық ассоциациясының президенті Дэвиндер Оримен өткізілген кездесу шеңберінде тараптар сингапурлік туристерді елордада өтетін көрмеге көптеп тарту мәселелерін талқылады. Бұл ретте екі елдің туроператорлары көрмеге сатылатын билеттерді тарату мәселесі жөнінде жан-жақты жұмыс жүргізуі керек. Дэвиндер Ори Астанада өтетін көрме шеңберінде сингапурлік туристерді Қазақстанға көптеп тарту мәселесінің оңтайы келіп тұрғандығын атап көрсетті.
Сонымен бірге, Р.Жошыбаев Сингапурде өтіп жатқан жыл сайынғы «NATAS Travel Fair 2016» халықаралық туристік көрмесіне қатысты. Осы көрме аясында ұйымдастырылған Қазақстан павильонының жұмысымен танысып, сингапурліктерге қазақстандық туристік әлеуеттің мүмкіндіктерін паш етті.
Ұлан САНЖАР