Қазақ елінде Қысқы Азиаданың зор табыспен өткендігі бұл күндері бүкіл әлемге мағлұм болды. Жақында Азия олимпиялық кеңесінің президенті Шейх Ахмад әл-Фахад әл-Сабах Алматы қаласының әкімі Ахметжан Есімовке алғыс хатын жолдап, Азиаданың табысты ұйымдастырылып өткізілуімен құттықтады.
Бұл хатта Қазақстанның спорттық құрамасы үшін тарихи табыс әкелген Алматыдағы жарыстарды ұйымдастыруда қолдау көрсетіп, ынтымақтастық жасағаны үшін қала әкімінің жеке өзіне де разылық сезімі білдірілді. Сондай-ақ, Қазақстандағы «Азиада-2011» Азия ойындарының барлық басқа ұйымдастырушылары үшін бой түзейтін үлгі болатындығы атап көрсетілді.
Алматыда аталмыш Ойындар үшін жасақталған спорттық нысандар мен инфрақұрылым жоғары халықаралық стандарттарға сай болып шықты. Мұның өзі жарыстардың ойдағыдай өтуіне игі ықпал жасады. Шейх әл-Сабах осынау ғажайып құрылыс-ғимараттардың бәрі таяу болашақта көптеген халықаралық аламан додалар мен жарыстардың куәсі болатынына сенімді екендігін атап айтты.
Қорғанбек АМАНЖОЛ.