Құрбан айт өңірде есте қаларлық оқиғалармен атап өтілді. Қазақстан мұсылмандары діни басқармасының өкіл имамы, Науан Хазірет атындағы орталық мешіттің бас имамы Қанат Қыдырмин жамағатты ұлық мерекемен құттықтауында жақсылық пен игіліктің ордасына айналған Отанымызды гүлдендірудегі ортақ ұмтылыстардың артқандығын атап өтті.
Құтты қадамның өркен жаюына діни қауымдастық та өзіндік үлес қосуда. Игі мысал ретінде, Көкшетау мешітінде әлеуметтік жағынан нашар қорғалған жандарға арналған дүкен ашылғанын айтуымызға болады. Дүкеннің ерекшелігі тегін қызмет көрсетуінде. Қалалық әлеуметтік қамсыздандыру бөлімінің тізімі бойынша мұнда 60 отбасы тіркеуге алынған. Олар азық-түлік, киім-кешек, тағы басқа тауарларды жеткілікті мөлшерде ала алады. Бас имамның мәлімдеуінше, дүкен мешіттің өз қаржысы мен демеушілердің көмегімен жұмыс істейді. Сондай-ақ, барлық жамағат үшін дүкеннің есігі ашық.
Бұған қосымша, облыстың барлық мешітінде мереке құрметіне құрбан шалынып, ас берілді. Қорғалжын ауданы мен Бестөбе кентіндегі бұқаралық шарада ұлттық спорт ойындары ұйымдастырылса, жас шәкірттер Құран оқудан сынға түсті.
Бақберген АМАЛБЕК,
«Егемен Қазақстан»
Ақмола облысы