Жақында Ұлттық музейде Италия мозаика мектебі шеберлерінің «Фриули мозаикасы» көрмесі салтанатты жағдайда ашылды. Сирек өнер туындылары ұсынылған шараны Италияның Қазақстандағы елшілігі мен Ұлттық музей ұжымы бірлесіп өткізіп отыр.
Фриули – Италияның солтүстік-шығысында орналасқан және Альпіден Адриатика жағалауларына дейінгі аймақты алып жатқан ерекше автономиялардың бірі болып саналады. Ал тарихы мыңдаған жылдарға кететін мозаика ешқашан қолданыстан шыққан емес және де әр ғасырда заманауи үлгіде кеңінен пайдаланылып келді. Сирек өнердің бұл түрі арқылы сәулет өнері айрықша түрленіп, адамзат өркениетінің баға жетпес құндылығы ретінде бағаланды.
Сонымен қатар, тарихи сәулетке қайталанбас өрнегімен жарқын ерекшеліктер де кіргізе алды. Италия шеберлерінің «Алтын балықтар», «Ат басты теңіз балықтары», «Аққулар», «Барылдақ торғайлар», «Әулие отбасы», «Тоқыма», «Құпия», «Көлеңкелер», «Уики және балықтар» сынды мозаика туындылары көне өнердің ежелден олармен егіз әрі қай кезеңде де бір-бірімен рухтас болғандығын байқатады.
Шараға қатысушылар алтын және платинамен қапталған майолика бұйымдарын, сондай-ақ түрлі өрнектермен безендірілген вазалар, табақтар, құмыралар, екі сапты графиндер, тегештер, үлкен шамдалдар, құмғандар, қобдишалар, барокко сағаттары сынды алуан түрлі заттарды тамашалады.
Барлығы 70-ке жуық керамика бұйымдары қойылған көрме қарашаның 28-іне дейін жалғаспақ.
Қарашаш ТОҚСАНБАЙ,
«Егемен Қазақстан»