БАҚ-тың досы дрон болмақ

Универсиада жарыстары кезінде журналистер өз жұмыстарын тиімді атқаруы үшін дрондарды пайдалану мүмкіндігі туды. Бұл туралы Алматыдағы ХХVІІІ Дүниежүзілік қысқы Универсиадаға дайындалу және өткізу жөніндегі дирекциясы мәлімдеп отыр. Осыған байланысты қауіпсіздік департаментінде жарыстарды, сондай-ақ, Универсиаданың ашылу және жабылу салтанаттары кезінде БАҚ-тың ұшқышсыз ұшатын аппараттарды (дрондарды) қолдану ережесі түсіндірілді. Универсиада іс-шара­лары мен жарыстарын өт­кізу кезінде спорттық ны­сан­дарда пилотсыз аппа­рат­тардың қолданылуы қатаң реттеледі. Дрондарды қолдануға  мүдделі БАҚ осы жөнінде Алматы қала­сы әкімдігінен, Ұлттық қауіп­сіздік комитетінен және Мемлекеттік қорғау қыз­метінен рұқсат алуы тиіс. Аталған органдармен осы рәсімді мақұлдаған соң, Дирекция баспасөз қыз­метіне дрондарды қолда­нылатынын хабарлау қажет. Бұл мекемелердің рұқ­сатын алу үшін БАҚ өкілдері дрондар қандай спорт нысанында, қай күні және қандай уақытта қолданылатыны жазылған ресми хатты дайындайды. Хаттың қосымшасында дронның бүкіл техникалық ерекшеліктері мен сипат­тізімдері (көтерілу биіктігі, аралап ұшып шығу радиусы, батареядан жұмыс жасау уақыты және т.б.) көрсетіледі. Сондай-ақ, дронның жұмысын бас­қаратын тұлғаның құжат­тағы мәліметтері ұсынылуы тиіс. Айнаш ЕСАЛИ, «Егемен Қазақстан» АЛМАТЫ