Алматыда алауы жағылатын ХХVІІІ қысқы Универсиада құрметіне орай 20 қаңтардан бастап 10 ақпан аралығында қала театрлары, концерт залдары, мұражайлары мен кітапханаларында, сондай-ақ, спорттық нысандарында мәдени іс-шаралар өткізіледі. Ең үлкен мәдени бағдарламаны Абай атындағы Қазақ мемлекеттік академиялық опера және балет театры және М.Лермонтов атындағы орыс мемлекеттік академиялық драма театры дайындамақ. Сондай-ақ, М.Әуезов атындағы Қазақ мемлекеттік академиялық театры, Корей мемлекеттік республикалық музыкалық комедия театры, Қ.Қожамияров атындағы ұйғыр мемлекеттік республикалық музыкалық комедия театры да үздік қойылымдарды сахналайды.
Жамбыл атындағы Қазақ мемлекеттік филармониясында мазмұнды мәдени бағдарлама қарастырылған, соның ішінде Қазақстанның еңбек сіңірген әртісі Ғ.Несіпбаевтың жетекшілік етуімен орган музыка кеші, үрмелі аспаптар оркестрінің концерті, халықаралық байқаулардың лауреаттары Жанар Сүлейменова, Амира Бейсенғалиева және басқа да әртістердің концерттері ұйымдастырылады.
«Алатау» театрының аумағында «Алатау алабында» этно-фестивалі өткізілмек. 29 қаңтарда ашылып, Универсиада аяқталғанша жұмыс істейтін аталған этно-фестиваль кезінде қолөнершілердің көрмесі өткізіліп, павильондар, киіз үйлер, дәстүрлі инсталляциялар қойылады, ұлттық тағам түрлері таныстырылады. Қаланың кітапханалары мен мұражайларында спорт тақырыбына арналған көрмелер, виртуалдық слайд-саяхаттар, сондай-ақ, еліміздің спортшылары мен спорт саласының өкілдерімен кездесулер өткізіледі.
Сондай-ақ, Универсиада өткізілетін бүкіл кезеңде, яғни 29 қаңтармен 8 ақпан аралығында Қазақ мемлекеттік циркінде 2017 жылғы ХХVІІІ Дүниежүзілік қысқы Универсиадаға арналған арнайы цирк бағдарламасы, ал 10 ақпанда Республика сарайында Қазақстанның еңбек сіңірген қайраткері Сейдолла Байтерековтің шығармашылығына арналған «Жан досым» концерті ұйымдастырылады.
«Егемен-ақпарат»