Ақтөбедегі Тахауи Ахтанов атындағы облыстық драма театрында облыстық планетарий ұжымы тұңғыш ғарышкер Юрий Гагариннің ғарышқа ұшқанына 50 жыл толуына орай ұйымдастырған «Жұлдызды 50 жыл» апталығының салтанатты ашылуы өтті.
Кеште көрермендер назарына тұңғыш ғарышкер Юрий Гагарин туралы бейнематериал ұсынылды. Апталықтың ашылу салтанатында сөз алған облыстық мәдениет басқармасының бастығы Нәзира Табылдинова шараның өткізілуіне сәттілік тілесе, ғарышкер-сынақшы, авиация полковнигі, ҚР ҰҒА «ҚазҒарыш» өкілі Айдын Айымбетов еліміздегі ғарыш саласының дамуын, осы бағытта түрлі жобалар қолға алынып, жобалау мен сынақ жұмыстары жүргізіліп жатқанын баяндады. Сондай-ақ жазушы-фантаст, ТМД Астрономия-геодезия қоғамының мүшесі Жүніс Сахиев жұлдыздарға Темірқазық, Үркер, Сүмбіле деп ат қойған қазаққа ғарыш кеңістігінің таңсық еместігін, топырағынан екі ғарышкер түлеп ұшқан Ақтөбені ғарышкерлер бесігі деуге болатынын атап өтті.
Кешке жиналғандар осы жерде қалалық техникалық шығармашылық орталығының үйірмесіне қатысушылардың қолынан шыққан түрлі жұмыстарды тамашалады. Биыл КСРО-ның ұшқыш ғарышкері, Кеңес Одағының Батыры В.Пацаевтың ғарышқа ұшқанына 40 жыл, бірінші тұңғыш қазақ ғарышкері Тоқтар Әубәкіровтің ұшқанына 20 жыл, жерлесіміз, В.Пацаев атындағы жас ұшқыштар мектебінің түлегі Юрий Лончаковтың алғаш ғарышқа ұшқанына 10 жыл, ұлтымыздың мақтанышы, қазір Ұлттық аэроғарыш агенттігінің төрағасы, ұшқыш-ғарышкер, Халық қаһарманы Т.Мұсабаевтың үшінші рет ұшқанына 10 жыл толады. Апталық аясында өткізілетін шараларда бұлар да әңгіме өзегіне айналмақ.
Сатыбалды СӘУІРБАЙ.
Ақтөбе облысы.