Кеше Көкшетау қаласында Ақмола облыстық мәслихатының кезектен тыс 32-ші сессиясы болып өтті. Күн тәртібінде Ақмола облысы әкімін тағайындау туралы мәселе қаралды.
Сессия жұмысына қатысқан Қазақстан Республикасының Президенті Әкімшілігінің Басшысы Аслан Мусин депутаттар корпусына Елбасы Н.Ә.Назарбаевтың Ақмола облысының әкімдігіне Сергей Дьяченконы қайта тағайындау жөнінде ұсыныс білдіргенін мәлімдеді. Ақмолалық депутаттар Елбасы ұсынысын бірауыздан қолдады.
Одан кейін облыс активінің жиналысын жүргізген А.Мусин Елбасының тиісті Жарлыққа қол қойғанын жеткізіп, С.А.Дьяченконы Ақмола облысының әкімі қызметіне қайта тағайындалуымен құттықтады. Ол Елбасы, Ұлт көшбасшысы Н.Ә.Назарбаевтың жоғары сенімін абыроймен атқаратынына сендіріп, өңір тынысын мемлекет алға қойған тапсырмалар деңгейінде жандандыруға сөз берді.
Актив жиналысында А.Мусин сөз сөйлеп, Елбасы Нұрсұлтан Назарбаевтың атынан кезектен тыс президенттік сайлауда жоғары белсенділік танытып, сенім білдірген ақмолалықтарға алғыс сезімін жеткізді.
Бақберген АМАЛБЕК.
Көкшетау.