Ұлтымыздың жадынан да, тұрмысынан да ысырылып бара жатқан салт-дәстүрлерді тірілтіп, ол жайында том-том кітаптар шығарып зерттеген этнограф, жазушы-сатирик Сейіт Кенжеахметов те дүниеден озды. «Егемен Қазақстан» ел газеті деген атына лайықты арысын жоғалтқан халыққа көңілін айтып, жазушымен қоштасты. Ал еліміздегі телеарналар мен радиолар үнсіз қалды. Өткенде Людмила Гурченко көз жұмғанда бірінен бірі озып, таласа эфирден орын берген электронды БАҚ-тардың осы жолы үнсіз қалуы қалай?
Топырағы торқа болғыр, Гурченко, әрине, мықты дарын иесі, бірақ ол дәл қазақ баласы үшін Сейіт Кенжеахметовтей еңбек етпегені айқын ғой. Арыстай азаматтың, ұлтына әлі де берері мол қаламгердің келместің кемесіне мініп, бақилық сапарға аттанғанын елемеген әріптестерімізге не айтуға болады?
«Өзіңді өзің жаттай сыйла, жат бойынан түңілсін» демейтін бе еді. Өзіміздің ардағымызды бағалай білейік деген ой ғой айтпағымыз.
Анар ТӨЛЕУХАНҚЫЗЫ.