Табиғаттың осындай өліара шағында жыл құстарының Қызылжар өңіріне ұшып келуі жұртшылық үшін таңғаларлық құбылыс болды. Ерте жеткен құстардың легін құс төресі – аққулар бастап келіп, облыс орталығы іргесіндегі көлге қонды. Бұл тоғанға №2 Петропавл жылу-электр стансасынан аққан жылы су үздіксіз құйылатындықтан, қатпайды. Қаз-үйректер мен тырналардың жылы канал жақты паналау себебі сондықтан.
– Табиғаттың жылынар мезгілі «таққа» мінетін шақ. Бірақ синоптиктер жорамалдаған «ерте көктем» әлі кешеуілдеп жатыр. Әйтпесе, құстар ұя салып, балапан өрбітетін мекеніне уақытында келуден қателескен жоқ. Қазір табиғаттың «мінезін» түсіну қиын болып барады. Оны адамдар түгіл құстар да айыра алмай жатады. Тамақ тауып жеу жағы ғана қиындық келтірмесе, тоңа қоймасы анық, дейді жергілікті орнитологтар.
Күннің салқындығы әсер етті ме, әлде ұзақ сапар қалжыратты ма, құстар көбіне жылы тоған мен канал маңайында ғана ұшып-қонып жүр. Адамдардан аулақ болуға тырысады.
Өмір ЕСҚАЛИ,
«Егемен Қазақстан»
Солтүстік Қазақстан облысы