Әріптестерін Штайнмайердің Германияның жаңа Президенті болып сайлануымен құттықтаған Мәжіліс Төрағасы оның жаңа қызметінде Қазақстан-Германия қатынастарын тереңдетуге оң ықпал ететініне сенім білдірді.
Н.Нығматулин Германия Қазақстанның Еуропалық Одақтағы маңызды сыртқы саяси және экономикалық әріптесі екенін атап өтті. Биыл екі ел арасында дипломатиялық байланыс орнағанына 25 жыл толды. Осы уақыт ішінде барлық салада өзара қарым-қатынас айтарлықтай жоғары деңгейге жетті. Әсіресе, Қазақстан Президенті Нұрсұлтан Назарбаевтың 2012 жылы Берлинге ресми сапары Қазақстан-Германия байланыстарын стратегиялық әріптестік деңгейіне көтерді.
Өткен жылы екі ел арасындағы сыртқы сауда айналымы 1,7 млрд АҚШ долларын құрады, бүгінгі күні елімізде 700-ден астам Германия кәсіпорындары табысты жұмыс атқарып келеді.
Мәжіліс Төрағасы делегация мүшелерін ағылшындық құқық жүйесіне негізделген «Астана» халықаралық қаржы орталығын құру және дамыту үшін қарқынды жұмыс атқарылып жатқандығынан хабардар етті.
Н.Нығматулин 2015 жылы Қазақстан Орталық Азия елдері арасында алғашқы болып Еуропалық Одақпен Кеңейтілген әріп-
тестік және ынтымақтастық туралы келісімге қол қойғанын айта келіп, құжаттың Бундестаг тарапынан тезірек ратификацияланатынына сенім білдірді.
Мәжіліс Төрағасы меймандарды елімізде жүргізілген конституциялық реформа төңірегінде толыққанды хабардар етті.
Өз кезегінде Манфред Грунд экономикалық құрылым мен әлеуметтік жүйе орната отырып, демократиялық жолмен өркендеу Қазақстанның өзгеге ұқсамайтын ерекше даму жолы екенін және оның жылдан жылға табысты жүзеге асырылып келе жатқанын атап өтті.
Одан әрі тараптар парламентаралық байланысты нығайтудың өзекті мәселелерін талқылады.