Алаш партиясы мен Алашорда өкіметінің құрылғанына биыл 100 жыл толып отыр. Осы даталы оқиғаны еске алу мақсатында Л.Н.Гумилев атындағы Еуразия ұлттық университетінде «Кітап тағдыры – қоғам тағдыры» атты халықаралық ғылыми-тәжірибелік конференция ұйымдастырылып, аталмыш шара аясында алаштанушы ғалым, профессор Тұрсын Жұртбайдың қос кітабы – «Боль моя, гордость моя – Алаш» және «Акинак» атты шығармаларының тұсауы кесілді.
Туынды авторы Тұрсын Жұртбай нағыз алашшыл азамат. Бұған дейін осы тақырыпты қаузаған «Ұраным – Алаш» атты кітаптар сериясы қазақша жарық көрген болатын. Жоғарыдағы орыс тілінде шыққан 1100 беттік көлемді туынды «Ұраным – Алаштың» толықтырылған аудармасы. Екінші кітап «Акинак» автордың тағы бір құнды еңбегі – екі томдық «Дулыға» кітабының жетілдірілген орысша нұсқасы. Кітапта Геродоттың шығармасы арқылы таныс Тарғытайдан бастап, көк түріктер дәуірінің билеушілері Білге қаған, Күлтегін қатарлы 77 тарихи адамның есім-тұлғасы баяндалады.
Тұсаукесер үстінде пікір білдірген танымал тарихшы Болат Көмековтің пайымынша, Тұрсын Құдакелдіұлының «Акинагы» – күллі Еуразия кеңістігін қамтитын хронологиялық кітап һәм ұлттың тарихи санасын қалыптастыратын дүние. Ал екінші туынды – шын мәнінде Алаштың қаны мен көзінің жасы. Бұл кітаптың жазылуына бірден-бір себепші адам – Олжас Сүлейменов. Олжекең 1987 жылы 13 қаңтар күні Тұрсынды шақырып алып, Мемлекеттік қауіпсіздік комитетінің архивіне кіріп, құжаттармен танысуға рұқсат алып берген. Архивте 2 жыл тапжылмай отырған Т.Жұртбайдың еңбегі кітап болып 30 жылдан кейін толық күйінде жарық көріп отыр.
Жиынға құрметті қонақ ретінде қатысқан Олжас Омарұлы: «Тұрсын жабулы қазанның бетін ашу үшін 30 жыл ғұмырын арнады. Ауыр еңбекті аса табандылықпен атқарып шықты», деп авторға зор алғысын білдірді.
Бекен ҚАЙРАТҰЛЫ,
«Егемен Қазақстан»