Кеше ауданға облыс әкімінің орынбасары Ғауез Нұрмұхамбетов барып, жағдайдың барлығын көзімен көрді. Әсіресе, судың деңгейі 1,5 метрге дейін көтерілген Кошевое, Қарамырза ауылдарында ауыр жағдай орын алды. Бұл ауылдарда су кірген қорада тұрған ұсақ мал, бұзау, шошқа шығын болды. Зеленов ауылында 10 үйдің өзі және 5 үйдің ауласы суда қалған. Олардан 53 адам қауіпсіз жерге көшірілді. Қарамырза ауылында да 7 үй суда тұр, 7 үйдің қора-қопсысы кішігірім көлшікке айналды. Он адам басқа жерге көшірілді.
Әулиекөл ауданындағы Көктал ауылында 15 үйге су кірген, 15 үйдің ауласын су басқан. 42 адам туыстарының үйіне көшірілді, 55 ірі қара, 81 ұсақ мал құрғаққа шығарылды. Екі ауданда да Төтенше жағдайлар департаментінен құтқарушылар, қажетті техникалар жұмыс істеуде, сонымен қатар, аудандық атқару органдарынан да адамдар мен техника жеткілікті бөлінген. Төтенше жағдайға байланысты қарғын судың зардабынан болған шығынды есептеу комиссиясы құрылып, жұмыс істей бастады.
– Судың беті енді қайтты. Қазір су басқан елді мекендердің барлық шығынын есептеу мүмкін емес. Әзірше суда қалып, өлген малдың шығыны ғана өтеледі. Сол үшін құрамында ветеринар, басқа да мамандар бар комиссия іске кірісті. Ал суда қалған тұрғындардың басқа шығыны сәл кейінірек, судан тазартылып, кептіру жұмыстары секілді зардаптарды жою жұмыстары аяқталған соң анықталады, – деді Қарасу ауданы әкімінің орынбасары Ерлан Балжақаев.
Облыс басшылығының шешімімен су тасқынынан зардап шеккен тұрғындарға қаржылай көмек көрсетілетін болды.
Нәзира ЖӘРІМБЕТОВА, «Егемен Қазақстан»
ҚОСТАНАЙ