Ұлттық идеология бізге ауадай қажет. Өз тілімізді, төл мәдениетіміз бен салт дәстүрлерімізді құрметтеп, сақтап қана қоймай, жас ұрпаққа, бүкіл әлемге насихаттау бізге, ғылым-білім саласы қызметкерлеріне жүктелетін зор жауапкершілік. Сананы рухани жаңғыртуға бәсекеге қабілетті білімді елдің ғана шамасы жетеді. Аталған мақаладан жаңаша бастау алатын «Туған жер», «Мәдени географиялық белдеу» жобалары ғылыми-ағарту зерттеулеріне кең тыныс береді. Сонымен қатар, әрбір азаматтың өзінің туған жерінің өсіп өркендеуі үшін нақты үлес қосуына үндейді.
Осы орайда, ұлттық сананы жаңаша жаңғыртуда қазақстандық әйелдердің белсене атсалысарына сенемін. Елін, жерін сүйетін батыр ұлдарымыз бен инабатты қыздарымызды бүкіл әлемге қазақ халқының тұлғасын дәріптейтіндей тәрбиелеу мәселесінің дәп осы тұста өзектілігін айтпасақ болмас.
Руханиятымыздың өрісін кеңітетін құндылықты пайымдауларды негізге ала отырып, ортақ ісімізге жаңа серпін алдық. Оны қапысыз жүзеге асыру міндет деп білемін. Осы орайда, дәстүріміздің ең бір асыл үлгісі – Әжелер институтын жаңғырту екені сөзсіз.
Шырын ҚҰРМАНБАЕВА,
Қазақ гуманитарлық-заң инновациялық университетінің ректоры, Қазақстан Президентінің жанындағы Әйелдер істері және отбасылық-демографиялық саясат жөніндегі ұлттық комиссияның мүшесі, саяси ғылымдар докторы, профессор