Өткен бейсенбінің кешінде қос команда алғаш рет сынға түсті. Бұл ойында есеп небәрі 30 секундтың ішінде ашылды. Төрешінің ысқырығы естілісімен алға ұмтылған ресейліктер Владимир Брюквиннің көмегімен есеп ашты.
Кездесудің келесі кезеңін айдын иелері ширақ бастаған, алайда тағы да бірінші болып гол жіберіп алды. 34-минутта Алексей Маклюков мергендігімен танылып, басымдықты арттыра түсті. Осыдан кейін «Торпедо» ойыншылары қорғаныста сақ ойнап, жүйелі ойын көрсетті. Нәтижесінде, кезеңнің аяқталуына санаулы секундтар қалғанда шығысқазақстандықтар сапынан Евгений Фадеев жалғыз голды салды.
Матчтың соңғы бөлігінде қауіпті сәттер ұйымдастырылғанмен, таблодағы көрсеткіш өзгеріссіз қалды. Қорытынды есеп – 1:2.
Келесі күні Өскеменде «Торпедо» мен «Динамо» арасындағы екінші ойын өтті. Екі команда толассыз шабуылдағанмен, алғашқы гол тек 24-минутта соғылды. Дмитрий Сидляровтың соққысынан кейін қонақтар алға шықты. Осы қарқындарынан таймаған «Динамо» арада 30 секунд өтер-өтпестен екінші шайбаны соғып үлгерді. Голдың авторы – Кирилл Пилипенко. Ал 35-минутта Дмитрий Марковин басымдықты арттыра түсті.
Ойынның соңғы бөлігінде өскемендіктер ес жиып, қарсы қақпаны жиі торуылдағанмен, бір ғана гол соға алды. Оны Джордон Сауторн өз еншісіне жазды. Бұл ретте қонақтар сапынан бір ойыншының кем болғанын айта кеткен жөн. Есеп – 1:3, тағы да «Динамоның» мерейі үстем болды.
17 сәуірде командалар Балашихада кездесті. Бұл жолы да өскемендіктердің жолы болмады. Ойын қорытындысында «Торпедо» 5:2 есебімен жеңіліп қалды. Сөйтіп, жалпы есеп 3:0-ге жетті. Кездесулер төрт жеңіске дейін ғана жалғасатынын ескерсек, өскемендіктердің енді үміт үдесінен шығулары екіталай.
Қалай десек те, кеше кешке командалар Балашихада төртінші кездесулерін өткізді.
Аян ӘБДУӘЛИ, «Егемен Қазақстан»