Сырт алаңда жауапсыз үш доп соғып, айдарынан жел ескен елордалық клубтың ерлігін Алматыда «Қайрат» та қайталады. Кахабер Цхададзе шәкірттері аяқдоп аламаны басталғалы топ басындағылардың жуан ортасында жүрген «Ордабасы» клубын 3:0 есебімен ойсырата ұтты. Сөйтіп, алматылық клуб үздік үштіктің ішінен ойып орын алды.
Бұл турға дейін топ бастап келе жатқан «Ертіс» өз алаңында «Қайсармен» ұпай бөлісуге мәжбүр болды. Павлодарлықтар матчтың 83-ші минутында есеп ашқанымен, ойынның соңына дейін табандылық таныта алмады. Жеңістің жалынан ұстатпағаны өз алдына, көш тізгіні де уыстан сусып кетті. Ал, біріншілікте біразға дейін топ бастаған «Дала қасқырлары» болса, сырғып-сырғып, турнир кестесінің белортасына түсті...
Турнир кестесіндегі көршілер «Тараз» бен «Ақжайық» бұл жолы бет жыртыспай, 0:0 есебімен тең тарқасты.
Көш соңындағы «Шахтердің» ширайтын түрі көрінбейді. Кеншілер бұл жолы «Тобылды» қабылдап, тағы да тең түсті. Есеп – 1:1. Қазір чемпионатта жеңіске жетпеген екі команда болса, соның бірі осы – «Шахтер». Оның үстіне, қарағандылықтар өз қақпасына голды ең көп жіберген көңілшек клуб. Команда әр ойынға шаққанда орташа есеппен екі доптан жіберіп отыр.
Жетінші турда «Ақтөбе» мен «Атырау» арасындағы ойын кейінге шегерілді. Себеп – Ақтөбедегі стадион мен қосалқы алаң ойын өткізуге әзірше дайын емес екен.
Жетінші турда ойналған матчтардың нәтижесі мынадай болып аяқталды:
«Шахтер» – «Тобыл» – 1:1 (0:1), Скорых, 45+2 – өзінің қақпасына (0:1). Тәжімбетов, 48 (1:1). «Оқжетпес» – «Астана» – 0:3 (0:0), Мужиков, 61 (0:1). Граховац, 64 – пенальтиден (0:2). Мұртазаев, 79 (0:3). «Қайсар» – «Ертіс» – 1:1 (0:0), Родриго, 83 (0:1). Нтибазонкиза, 86 (1:1). «Тараз» – «Ақжайық» – 0:0 (0:0). «Қайрат» – «Ордабасы» – 3:0 (2:0), Исламхан, 6 (1:0). Гоу, 43 (2:0). Иличевич, 70 (3:0). «Актөбе» – «Атырау», ойын кейінге шегерілді.
Сұрмергендер арасындағы сында Жерар Гоу («Қайрат») жеті голмен алда келеді. Екінші орындағы Алексей Щеткиннің («Тобыл») еншісінде төрт гол бар.
23 сәуір күні өтетін 8-ші турда командалар былайша жұп құрап, өзара күш сынасады:
«Ордабасы» – «Тобыл», «Ертіс» – «Қайрат», «Акжайық» – «Қайсар», «Астана» – «Тараз», «Атырау» – «Оқжетпес», «Ақтөбе» – «Шахтер».
Қайрат ӘБІЛДИНОВ, «Егемен Қазақстан»