Осы орайда ерекше атап көрсететін жайт – еліміз тәуелсіздігін алғалы бері ешбір этносаралық немесе дінаралық араздыққа жол берілген жоқ. Қазақстанда тұрып жатқан барша этнос өкілдерінің теңдей мүмкіндіктері мен құқықтарының қамтамасыз етілуі олардың өз болашағына деген сенімдерін нығайтты. Бұған, бірінші кезекте, мемлекеттің ұлттық саясатты дұрыс бағытта жүргізіп келе жатқандығы оң ықпалын тигізіп отыр.
Қазақстанның этносаралық саясаты халықаралық қоғамдастық тарапынан жоғары бағасын алып та үлгерді. Әрине, оның астарында зайырлы мемлекеттің бәсекеге қабілеттілігі мен азаматтарын қазіргі заман талабына сай қалыптастырудағы рөліне, сондай-ақ, елімізде тұратын барша халыққа қатысты ішкі саясатының дұрыстығына деген дұрыс көзқарас жатқаны анық. Жалпы, Қазақстан айналасындағы мемлекеттермен де тату көршілік қарым-қатынас орнатқан. Сол сияқты, Батыс пен Шығыс арасындағы өркениеттер үнқатысуына өзіндік үлесін қосып келеді.
Сонымен қатар, еліміз әлемде бейбітшілік пен түсіністік қалыптастыру бағытында да өзіндік ұтымды ұсыныстарымен және бағалы бастамаларымен ерекшеленеді. БҰҰ-ның экс-Бас хатшысы Пан Ги Мун елімізге жасаған сапары барысында Қазақстан халқы Ассамблеясы қызметінің қағидаты БҰҰ жұмысымен сәйкес келетінін Отанымыздағы бейбіт өмірді көзімен көріп, көңілі толған соң айтса керек.
Жалпы, Қазақстан ТМД-ға мүше мемлекеттер ішінде алғаш болып керемет институт – Қазақстан халқы Ассамблеясын құрды. Мұның ұтқыр шешім болғаны анық. Соның арқасында этносаралық және дінаралық келісімді нығайтуға бағытталған полиэтностық қоғамның қазақстандық моделі қалыптасты. Ал 2007 жылдың мамырынан бастап Парламент бірқатар конститутциялық өзгерістер енгізіп, Мәжіліс депутаттарының санын 107 адамға көбейтсе, соның 9-ы Қазақстан халқы Ассамблеясынан сайланатын болып шешілді.
Әрине, мұның өзі Ассамблея рөлін барынша арттыра түсті. Сондай-ақ, 2008 жылдың 20 қазанында қабылданған «Қазақстан халқы Ассамблеясы туралы» Заң да этносаралық қатынастар саласындағы азаматтық институттар мен мемлекеттің тиімді өзара ықпалдастығын арттырып, еліміздегі қоғамдық-саяси тұрақтылықты қамтамасыз етуге үлес қосты және мемлекеттің ұлттық саясатын жүзеге асыру мен Ассамблея жұмысын ұйымдастыруда үлкен жетістіктерге қол жеткізуге мүмкіндік берді.
Ассамблея мақсатының өзі баршаны қазақ халқының айналасына топтастыра отырып, қазақстандық патриотизмді қалыптастыру ғой. Бұл жерде бастысы, халқымыздың азаматтық және рухани-мәдени ортақтығы негізінде қазақстандық бірегейлікті қалыптастыру жолымен ұлтты бәсекеге қабілетті ету десек, осы орайда елімізде тұрып жатқан жүзден астам этнос өкілдерінің Қазақстанды өз Отандары санап, елімізде ұлтаралық түсіністік саясатын ұстанулары аса маңызды.
Қоғамымыздың құндылықтары мен қағидаттарына негізделген Ел бірлігі доктринасы 2010 жылы сәуірде, осыдан тура жеті жыл бұрын қабылданған болатын. Бұл – болашаққа бірігіп ұмтылуға серпін қосатын маңызы бар құжат десек, сол ұтымды ұмтылыс арқылы біз Мәңгілік Елдің іргетасын қазірден қалап жатқанымызды айқын сезінудеміз.
Қорыта айтқанда, қазақта «Ырыс алды − ынтымақ» немесе «Бірлік бар жерде тірлік бар» деп халықты татулық пен бірлікке шақыратын мағыналық маңызы жоғары сөздер бар. Ендеше, сол бірлік пен тірлігіміз жарасым тауып жатса, ешкім де бізді сырттан келіп бүлдіре алмайды. Яғни, іштей ынтымағы жарасқан елді ешбір сыртқы жау жеңе алмаса керек. Сондықтан бізді елдік идеясы біріктіріп, ортақ құндылықтар жұдырықша жұмылдыра беруі тиіс деп пайымдаймыз.
Самат МҰСА,
«Егемен Қазақстан»